Latur Crime News : लातूर : लातूर जिल्ह्यातील औसा तालुक्यातील भादा पोलीस ठाणे हद्दीतील वडजी गावात एकाचा निर्दयी खून झाल्याची घटना घडली आहे. एका युवकाचा झोपेत असताना डोक्यात व गळ्यावर वार करून खून केला गेला.ही घटना शनिवारी उघडकीस आली. रणजित उर्फ बाळू तानाजी माळी (वय 22 वर्ष) असे खून झालेल्या तरुणाचे नाव आहे.
या घटनेबाबत पोलिसांनी खुनाचा गुन्हा दाखल करत तपास सुरु केला. दरम्यान, आईसोबत संबंधांचा संशय आल्याने मित्राची हत्या केल्याचं पोलीस तपासात समोर आले आहे.
रणजित हा अविवाहित असून आई-वडीलांना शेतीत मदत करत होता. तो दुग्ध व्यवसाय करायचा. शुक्रवारी नेहमीप्रमाणे आपल्या शेतात मुक्कामी गेला. रात्री उशिरा किंवा पहाटेच्या वेळी अज्ञाताने झोपेत त्याच्या डोक्यात व गळ्यावर धारधार कोयत्याने वार करून त्याचा खून केला. ही घटना शनिवारी सकाळी आठ वाजण्याच्या सुमारास उघडकीस आली.
दरम्यान, पोलिसांकडून गावात चौकशी सुरु असतानाच मृत रंजितचे महिलेशी अनैतिक संबंध होते आणि तिचा मुलगा रंजितचा मित्र असल्याची माहिती पोलिसांना मिळाली. पोलिसांनी तात्काळ एका 17 वर्षीय मुलास चौकशीसाठी ताब्यात घेतले. त्याला विचारपूस केली असता त्याने उडवाउडवीची उत्तरे दिले. दरम्यान, याचवेळी याच तरुणाने गावातील एका मुलाकडून कोयत्याला धार लावून नेल्याची माहिती पोलिसांना मिळाली. त्यामुळे पोलिसांनी त्याची कसून चौकशी केली असता त्याने खुनाची कबुली दिली.
