Filmfare Awards 2024 : मुंबई : यंदाचा फिल्मफेअर पुरस्कार 2024 गुजरातमध्ये होणार आहे. त्यामुळे यंदाच्या पुरस्कार सोहळ्याची प्रेक्षकांसह बॉलिवूडकरांना उत्सुकता आहे. फिल्मफेअर हा हिंदी मनोरंजनसृष्टीतील सर्वात ग्लॅमरस आणि जुना पुरस्कार सोहळा आहे. या पुरस्कार सोहळ्यात सेलिब्रिटी आपल्या जबरदस्त सादरीकरणाने रेड कार्पेटवर आग लावतात.
28 जानेवारी 2024 रोजी गांधीनगरमध्ये ‘फिल्मफेअर अवॉर्ड्स 2024’ हा पुरस्कार सोहळा होणार आहे. ‘फिल्मफेअर अवॉर्ड्स 2024’मध्ये प्रेक्षकांनाअभिनेत्रींच्या हॉट अदा, धमाकेदार नृत्य सादरीकरण आणि मस्ती पाहायला मिळणार आहेत.
जुलै 2023 मध्ये गुजरात पर्यटन निगम लिमिटेडने (टीसीजीएल) 69 व्या फिल्मफेअर पुरस्कारांच्या आयोजन करण्याचं ठरवलं होतं. या पुरस्कार सोहळ्यात गुजरातचे मुख्यमंत्री भूपेंद्र पटेलदेखील उपस्थित असणार आहेत. त्यांच्यासह बॉलिवूड अभिनेता टायगर श्रॉफदेखील हिंदी सिनेसृष्टीचं प्रतिनिधित्व करताना दिसून येईल.
आलिया भट्टला ‘फिल्मफेअर अवॉर्ड्स 2023’मध्ये ‘गंगूबाई काठियावाडी’ या सिनेमासाठी पुरस्कार मिळाला आहे. या सिनेमातील भूमिकेसाठी तिचा गौरव करण्यात आला आहे. तर राजकुमार रावलादेखील सर्वोत्कृष्ट अभिनेत्याचा पुरस्कार मिळाला आहे.
फिल्मफेअर पुरस्कार सोहळ्याची सुरुवात 1954 रोजी झाली आहे. ब्लॅकने एका वर्षात सर्वाधिक फिल्मफेअर पुरस्कार आपल्या नावे केले होते. यात सर्वोत्कृष्ट सिनेमा, सर्वोत्कृष्ट दिग्दर्शक, सर्वोत्कृष्ट अभिनेता, सर्वोत्कृष्ट अभिनेत्री, सर्वोत्कृष्ट सहाय्यक अभिनेत्री, सर्वोत्कृष्ट एडिटिंग असे 11 पुरस्कार 2005 साली ‘ब्लॅक’ला मिळाले होते. दिग्गज कलाकारांच्या उपस्थितीत हा अभिमानाचा पुरस्कार सोहळा पार पडणार आहे. या सोहळ्यात सेलिब्रिटींचा ग्लॅमरस अंदाज पाहायला मिळणार आहे.
