Sillod News : सिल्लोड : सिल्लोड येथे आज एसटी चालकाला आणि वाहकाला विचित्र प्रकाराला सामोरं जाव लागलं. या घटनांमध्ये पहिल्यांदा एक प्रवासी अंभईकडे जाणाऱ्या बससमोर उभा राहिला. त्याने बसचालकास मारहाण केली. घटना सिल्लोड शहरातील मुख्य रस्त्यावर दहा वाजेच्या सुमारास घडली. यासोबतच वाहकाजवळील तिकिटाचे पैसे घेऊन तिघे जण पळून गेले. याप्रकरणी सिल्लोड शहर ठाण्यात तिघांविरूद्ध गुन्हा दाखल करण्यात आला आहे.
सिल्लोड आगाराची बस सिल्लोड ते अंभईला जात होती. चालक दिनकर दांडगे हे बस घेऊन निघाले होते. शहरातील मुख्य रस्त्यावरील एकतानगरच्या गल्लीसमोर एक जण अचानक बसच्यासमोर उभा राहिला. चालकाने बस बंद करून संबंधित व्यक्तीस बाजूला करण्याचा प्रयत्न केला असता ती व्यक्ती दारू पिलेली होती. त्यामुळे त्याचा तोल जाऊन तो खाली पडला.
हे बघून एकतानगर येथील तीन मुले त्याठिकाणी आली व त्यांनी बसचालकास मारहाण करण्यास सुरूवात केली. भांडण सोडविण्यासाठी बस वाहक तसेच बसमधील प्रवासी गेले असता त्यांनाही तिघांनी हाथापाई केली. त्यानंतर वाहकाजवळील तिकिटांचे पैसे घेऊन तिघे जण पळून गेले. त्यानंतर चालकास त्या मुलांची नावे कळाल्यानंतर चालकाने संशयित आरोपी अक्रम शहा, भुऱ्या शहा व सोहिल शहा सर्व यांच्या विरोधात शासकीय कामात अडथळा आणल्याप्रकरणी सिल्लोड शहर पोलिस ठाण्यात गुन्हा दाखल करण्यात आला आहे.
