पुणे : सावित्रीबाई फुले पुणे विद्यापीठाच्या परीक्षा विभागातर्फे घेतला जाणारा एम.बी.ए.च्या ‘लीगल एसपेक्ट ऑफ बिझनेस’ या विषयाचा पेपर फुटल्याने एकच खळबळ उडाली आहे. एमबीए प्रथम वर्षाच्या प्रथम सत्राचा हा पेपर होता. चिखली येथील डी. वाय. पाटील कॉलेज येथून शुक्रवारी (ता. २२) प्रश्नपत्रिका फुटल्याची प्राथमिक माहिती समोर आली आहे. त्यामुळे विद्यापीठाने ही परीक्षा रद्द करण्याचा निर्णय घेतला आहे. आता पुन्हा एकदा या विद्यार्थ्यांना परीक्षा द्यावी लागणार आहे.
सर्व प्रकरणाची चौकशी केल्यानंतर दोषींवर नियमानुसार कारवाई केली जाणार असल्याची माहिती प्रशासनातर्फे देण्यात आली आहे. येत्या २६ डिसेंबर रोजी सकाळी १० ते १२.३० या दरम्यान हा फुटलेला पेपर पुन्हा घेतला जाणार आहे. याची सर्व संबंधितांनी नोंद घ्यावी, असे आवाहन करण्यात आले आहे.
सावित्रीबाई फुले पुणे विद्यापीठाच्या परीक्षा विभागातर्फे पुणे, अहमदनगर व नाशिक या तीन जिल्ह्यांमध्ये संलग्न महाविद्यालयातील सुमारे साडेसात लाख विद्यार्थ्यांची परीक्षा घेतली जाते. ऑक्टोबर २०२३ या सत्राची परीक्षा २१ नोव्हेंबरपासून सुरळीतपणे सुरू झाली आहे. त्यात एमबीए अभ्यासक्रमाची परीक्षा ११ डिसेंबरपासून सुरू झाली आहे. २२ डिसेंबर रोजी एम.बी.ए. २००९ रिवाईज प्रथम सत्रातील ‘लीगल अस्पेक्ट ऑफ बिझनेस’ या विषयाची परीक्षा सकाळी ११ वाजता सुरू होणार होती. परंतु तत्पूर्वीच या विषयाची प्रश्नपत्रिका सोशल मीडियावर व्हायरल झाल्याचे आढळून आले. त्यामुळे विद्यापीठाने ही परीक्षा रद्द करण्याचा निर्णय घेतला आहे. परीक्षेची गोपनीयता व पवित्रता लक्षात घेता विद्यापीठाने पेपर रद्द करण्याचा निर्णय घेतला आहे. शुक्रवारी पेपर फुटीची घटना समोर आल्यामुळे रद्द करण्यात आलेला पेपर येत्या २६ डिसेंबर रोजी सकाळी १० ते १२.३० या वेळेत घेतला जाणार आहे.
