पुणे : केंद्रीय माध्यमिक शिक्षण मंडळाने (सीबीएसई) दहावी आणि बारावीच्या परीक्षांचे वेळापत्रक जाहीर केले आहे. वेळापत्रकानुसार दहावीची परीक्षा १५ फेब्रुवारी ते १० एप्रिल, तर बारावीची परीक्षा १५ फेब्रुवारी ते २ एप्रिल या कालावधीत होणार आहे.
दरम्यान, सीबीएसईने २०२२-२३ च्या निकालावेळीच दहावी आणि बारावीच्या परीक्षा १५ फेब्रुवारीपासून सुरू होणार असल्याचे जाहीर केले होते. त्यामुळे विद्यार्थी आणि पालकांना विषयनिहाय व दिनांकनिहाय वेळापत्रकाची प्रतीक्षा होती. आता सीबीएसईने सविस्तर वेळापत्रक जाहीर केल्याने विद्यार्थी आणि पालकांना दिलासा मिळाला आहे. सीबीएसईच्या वेळापत्रकानुसार सुमारे ५५ दिवस या परीक्षा चालणार आहेत.
या परीक्षेत दोन विषयांच्या पेपरमध्ये पुरेसा कालावधी ठेवण्यात आला आहे. या परीक्षेचे वेळापत्रक खूप आधीच जाहीर करण्यात आले असल्याने विद्यार्थ्यांना परीक्षेची चांगली तयारी करता येणार आहे, असे मंडळाने परिपत्रकात म्हटले आहे. वेळापत्रक तयार करताना जेईईसारख्या स्पर्धात्मक परीक्षांचा विचार करण्यात आला आहे. मंडळाच्या ‘https://www.cbse.gov.in’ या अधिकृत संकेतस्थळावर दहावी-बारावीच्या परीक्षांचे विषयनिहाय सविस्तर वेळापत्रक देण्यात आले आहे.
