हडपसर (पुणे) : कारचा धक्का लागल्याच्या कारणावरून झालेल्या हाणामारीत ७ ते ८ जणांनी तरुणाच्या तोंडावर, डोक्यावर धारदार शस्त्राने वार करीत निघृण खून केल्याची खळबळजनक घटना फुरसुंगी ते चंदवाडी रस्त्यावर मंगळवारी (ता. १२) रात्री दहा वाजण्याच्या सुमारास घडली. याप्रकरणी हडपसर पोलीस ठाण्यात ७ ते ८ जणांविरुद्ध गुन्हा दाखल करण्यात आला आहे.
अभिषेक संजय भोसले (वय ३०, रा. शेवाळवाडी, मांजरी, ता. हवेली) असे खून झालेल्या व्यक्तीचे नाव आहे. याप्रकरणी अथर्व दादासाहेब साबळे (वय १८, रा. ऑर्चीड रिसिडेन्सी, शेवाळवाडी, ता. हवेली) यांनी फिर्याद दिली आहे. त्यानुसार पोलिसांनी विलास सुरेश सकट, कैलास सुरेश सकट, सचिन सकट (सर्व रा. चंदवाडी, फुरसुंगी) यांच्यासह आणखी ७-८ अनोळखी व्यक्तींविरुद्ध हडपसर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी यांचे मामा अभिषेक हे त्यांची कार घेऊन मंगळवारी (ता. १३) जात होते. त्यांची गाडी घासल्याच्या कारणावरून विलास सकट याच्याशी किरकोळ वाद झाले. नुकसानभरपाईची विचारणा केली असता आरोपी विलास सकट, कैलास सकट, सचिन सकट यांनी त्यांना साथीदारांसह शिवीगाळ करून व जीवे मारण्याची धमकी दिली. त्यानंतर लोखंडी धारदार शस्त्र व दगडाने जबर मारहाण करून त्यांना ठार मारले.
दरम्यान, मारहाण सुरू असताना मामाला वाचवायचा गेलेला फिर्यादी अथर्व याला देखील दगडाने व लाथाबुक्क्याने मारहाण केली. या घटनेचा पुढील तपास सहायक निरीक्षक नानासाहेब जाधव करीत आहेत.
