नवी मुंबई : नवी मुंबईतील घणसोली परिसरात एक धक्कादायक प्रकार घडला आहे. गृहपाठाला दिलेल्या गणिताचं उत्तर चुकल्यानं नववीत शिकणाऱ्या विद्यार्थिनीला एका शिक्षिकेनं लाकडी बांबूने मारहाण केल्याचं आहे. याप्रकरणी पीडित विद्यार्थिनीच्या पालकांनी दिलेल्या तक्रारीवरून पोलिसांनी शिक्षिकेवर गुन्हा दाखल केला आहे. शकीला अन्सारी, असं गुन्हा दाखल झालेल्या शिक्षिकेचं नाव आहे. या घटनेनं परिसरातून संताप व्यक्त केला जात आहे.
पोलिसांनी दिलेल्या अधिक माहितीनुसार, पीडित विद्यार्थिनी ही घणसोली परिसरात राहत आहे. ती सेक्टर ५ मध्ये असलेल्या सना या खासगी कोचिंग क्लासमध्ये शिकवणीला जाते. यावेळी क्लासच्या शिक्षिका शकीला अन्सारी यांनी ट्यूशनमधील विद्यार्थ्यांना गृहपाठ दिला होता. त्यामध्ये काही विद्यार्थ्यांचा गृहपाठ पूर्ण झाला नव्हता. तर काहींची उत्तरे चुकली होती. पीडित मुलीचं देखील गणिताचं उत्तर चुकलं होतं.
याच कारणावरून शकीला यांना राग अनावर झाला. त्यांनी पीडितेला बांबू आणि लाकडी बांबूने बेदम मारहाण केली. यामुळे पीडितेच्या अंगावर ठिकठिकाणी सूज आली. हा सर्व प्रकार पीडित मुलीने आपल्या आई-वडिलांना सांगितला. मुलीच्या अंगावरील जखमा पाहून आई-वडिलांनी तातडीने पोलिसांत धाव घेतली. याप्रकरणी शनिवारी संध्याकाळी कोपर खैरणे पोलिसांनी शिक्षिका शकीला अन्सारी विरोधात गुन्हा दाखल केला असून पुढील तपास पोलीस करत आहेत.
