सागर जगदाळे/ भिगवण, (पुणे) : पळसदेव (ता. इंदापूर) येथील पळसनाथ विद्यालयाचा विद्यार्थी हरीश डोंबाळे याने राष्ट्रीय सायकलिंग स्पर्धेत रौप्यपदक पटकाविले आहे. याबाबतची माहिती विद्यालयाचे प्राचार्य बाळू काळे यांनी दिली.
झारखंड राज्यातील रांची येथे रांची सायकलिंग असोसिएशनतर्फे ३० नोव्हेंबर ते ४ डिसेंबर या कालावधीत ही स्पर्धा पार पडली. या स्पर्धेत सब ज्युनियर राष्ट्रीय ट्रॅक सायकलिंग चॅम्पियनशिप स्पर्धेत १६ वर्ष वयोगटात महाराष्ट्राचे नेतृत्व हरीश डोंबाळे याने केले. या स्पर्धेत त्याने रौप्यपदक मिळवले. या सायकलिंग स्पर्धेतील यशाबद्दल या राष्ट्रीय खेळाडूचा पळसनाथ शिक्षण प्रसारक मंडळाच्या वतीने सत्कार करण्यात आला.
यावेळी इंदापूर तालुका क्रीडाधिकारी आमसिद्ध सोलनकर, पळसनाथ शिक्षण प्रसारक मंडळाचे अध्यक्ष भूषण काळे, सचिव योगिराज काळे, संचालक राजेंद्र काळे, पळसदेवचे सरपंच आजिनाथ पवार, न्हावीच्या सरपंच आशा डोंबाळे, ग्रामपंचायत सदस्य महेंद्र काळे, अंकुश जाधव, विद्यालयाचे प्राचार्य बाळू काळे, पर्यवेक्षक विकास पाठक, सिकंदर देशमुख, नितीन जगदाळे यांच्यासह ग्रामस्थ, शिक्षक, विद्यार्थी मोठ्या संख्येने उपस्थित होते.
