बारामती, (पुणे) : बारामती येथील नामांकित विद्याप्रतिष्ठान महाविद्यालयाच्या बाहेर लावलेली ४० हजार रुपये किमतीची दुचाकी अज्ञात चोरट्याने पळवून नेल्याची नुकतीच उघडकीस आली आहे. सोमवारी (ता.४) दुपारी तीन वाजण्याच्या सुमारास ही घटना घडली आहे.
याप्रकरणी अथर्व गोरख राजपुरे (वय २२, रा. खुटबाव ता. दौंड) यांनी अज्ञात चोरट्यांच्या विरोधात बारामती शहर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, अथर्व राजपुरे हे खुटबाव या ठिकाणी राहण्यास असून, बारामती येथील विद्याप्रतिष्ठान महाविद्यालयात बीएएलएलबीचे शिक्षण घेत आहेत. नेहमीप्रमाणे सोमवारी (ता. ०४) सकाळी राहत्या घरातून त्यांच्याजवळ असलेली दुचाकी (MH42 AP 7314) घेऊन महाविद्यालयात गेले होते. यावेळी महाविद्यालयाच्या बाहेर असलेल्या गेट नंबर १ समोर गाडी लॉक करुन कॉलेजला गेले होते.
दुपारी तीन वाजण्याच्या सुमारास महाविद्यालयाच्या बाहेर आले असता त्यांना सदर ठिकाणी लावलेली दुचाकी दिसून आली नाही. तसेच आजूबाजूला शोध घेतला असता दिसून आली नाही. त्यामुळे अज्ञात चोरट्याच्या विरोधात बारामती शहर पोलीस ठाण्यात फिर्याद दिली आहे. पुढील तपास बारामती पोलीस करत आहेत.
