पिंपरी : मावळ लोकसभा मतदारसंघात तळेगाव दाभाडे नगर परिषदेच्या मुख्याधिकाऱ्यांच्या बदलीच्या निमित्ताने अजितदादा गटाचे आमदार आणि शिंदे गटाचे खासदार यांच्यामध्ये वाद झाला आहे. शिंदे गटाचे खासदार श्रीरंग बारणे आणि अजितदादा गटाचे मावळचे आमदार सुनील शेळके यांच्यात चांगलीच खडाजंगी झाली.
मावळ विधानसभा मतदारसंघात मध्यवर्ती केंद्र असलेल्या तळेगाव दाभाडेचा समावेश येतो. मागील तीन वेळा मावळचा आमदार तळेगावमधीलच आहे. खासदार बारणे आणि आमदार शेळके यांचे चांगले संबंध होते. परंतु, तळेगाव नगर परिषदेच्या मुख्याधिकाऱ्यांच्या बदलीवरून त्यांच्यात एकमत झाले नाही.
तळेगावातील तत्कालीन सत्ताधारी जनसेवा विकास समितीचे संस्थापक दिवंगत किशोर आवारे यांनी तत्कालीन मुख्याधिकारी विजयकुमार सरनाईक यांची बदली करून त्यांच्या जागी एन. के. पाटील यांची नियुक्ती करण्याची मागणी केली होती. आवारे यांच्या मागणीवरून सरनाईकांच्या बदलीसाठी मुख्यमंत्री एकनाथ शिंदे यांना पत्र दिल्याचे बारणे यांनी कबूल केले. त्यामुळे अवघ्या पाच महिन्यांत सरनाईक यांची मुदतपूर्व बदली झाली आणि त्यांच्या जागी एन. के. पाटील आले.
गेल्या सात महिन्यांपासून मूलभूत नागरी सुविधाही मिळत नसल्याने तळेगाव शहरातील नागरिक हैराण झाले. नगर परिषदेच्या कारभारातही विस्कळीतपणा आला. बारणे यांनी अकार्यक्षम मुख्याधिकारी आणल्याची टीका शेळके यांनी केली. पाटील यांच्या नियुक्तीवरून बारणे आणि आमदार सुनील शेळके यांच्यात मोठा कलगीतुरा रंगला होता.
विकासकामांची माहिती देण्याची मागणी
श्रीरंग बारणे यांनी दहा वर्षांत केंद्राच्या निधीतून मावळमध्ये कोणती विकासकामे केली याचा लेखाजोखा मांडण्याची मागणी करत मावळ लोकसभेच्या जागेवर शेळके यांनी दावा केला. त्याला बारणे यांनीही प्रत्युत्तर देत मी जनतेला लेखाजेखा देण्यासाठी बांधील असून, कोणा व्यक्तीला नाही. शेळके कोणाच्या सांगण्यावरून बोलत आहेत, असा सवाल केला होता.
