Pune Crime पुणे: खेड तालुक्यातील निघोजेमध्ये एका व्यक्तीला बेदम मारहाण करून त्याचे कपडे काढत मोकळ्या जागेत नग्नावस्थेत सोडून दिले होते. त्या जखमी व्यक्तीचा उपचारादरम्यान मृत्यू झाला. ही घटना बुधवारी (दि. 29) घडली.
मृत्यू झालेल्या व्यक्तीची ओळख अद्याप पटलेली नाही. अज्ञातांच्या विरोधात खून आणि पुरावा नष्ट करण्याचा प्रयत्न केल्याचा गुन्हा या प्रकरणी दाखल करण्यात आला आहे. महाळुंगे एमआयडीसी पोलीस ठाण्यात पोलीस अंमलदार अर्जुन सोनटक्के यांनी फिर्याद दिली आहे.
पोलिसांनी दिलेल्या माहितीनुसार, निघोजे गावात एक जखमी व्यक्ती नग्नावस्थेत पडला असल्याची माहिती बुधवारी सकाळी साडेनऊ वाजताच्या सुमारास महाळुंगे पोलिसांना मिळाली.त्यानंतर महाळुंगे पोलिसांनी घटनास्थळी धाव घेतली. 30 ते 35 वर्ष वयोगटातील एका व्यक्तीला अज्ञातांनी डोक्यावर आणि शरीरावर ठिकठिकाणी मारून गंभीर जखमी केले होते.
मारहाण केल्यानंतर सदर व्यक्तीची ओळख पटू नये, यासाठी आरोपींनी जखमी व्यक्तीच्या अंगावरचे सर्व कपडे काढून त्याला नग्नावस्थेत सोडून दिले. रक्ताच्या थारोळ्यात पडलेल्या व्यक्तीला महाळुंगे पोलिसांनी ताबडतोब रुग्णालयात दाखल केले. परंतु, डोक्याला झालेल्या गंभीर दुखापतीमुळे त्या व्यक्तीचा उपचारादरम्यान मृत्यू झाला. महाळुंगे एमआयडीसी पोलीस ठाण्याचे वरिष्ठ पोलीस निरीक्षक वसंत बाबर या प्रकरणाचा आधिक तपास करीत आहेत.
