अहमदनगर: अहमदनगर जिल्ह्यातून एक धक्कादायक घटना समोर येत आहे. श्रीगोंदा शहरातून पत्नी बेपत्ता झाल्याचा बनाव करून स्वतःच्या अनैतिक प्रेम संबंधात अडथळा ठरणाऱ्या स्वतःच्या पत्नीला बेदम मारहाण करून तिचा खून केला आहे. याप्रकरणी ज्ञानदेव आमटे याच्यावर श्रीगोंदा पोलीस ठाण्यात गुन्हा दाखल करण्यात आला आहे. खुनाचा पुरावा नष्ट करण्यासाठी त्याने घराजवळ खड्डा करून त्यात पत्नीला पुरून पत्नी बेपत्ता झाल्याची फिर्याद पोलीस ठाण्यात दिली होती. एवढंच नाही तर तो तिला शोधण्यासाठी इकडे तिकडे फिरत होता.
याबाबत पोलिसांनी दिलेल्या अधिक माहितीनुसार, पारगाव येथील ज्ञानदेव पोपट आमटे याचे गावातीलच एका महिलेशी खूप दिवसांपासून अनैतिक संबंध होते. या प्रेम संबंधाची पत्नी रुपाली आमटे वारंवार चौकशी करत असत. याच रागातून ज्ञानदेव याने स्वतःच्या पत्नीला बेदम मारहाण करून तिचा खून केला. दरम्यान, या पत्नीच्या खुनाचा पुरावा नष्ट करण्यासाठी मयत रूपालीचा मृतदेह कापडामध्ये बांधून घराजवळ खड्डा करून पुरला.
त्यानंतर श्रीगोंदा पोलीस ठाण्यात येऊन मी स्वतः मयत पत्नी रूपालीला चारचाकी गाडीत घेऊन शहरातील एका ब्युटी पार्लर मध्ये सोडलं होतं. नंतर तिला पुन्हा घेण्यासाठी आलो असता ती बेपत्ता झाली, अशी तक्रार त्याने दिली होती. याबाबत आरोपी ज्ञानदेव पोपट आमटे याच्याविरुद्ध पत्नीच्या खुनासह पुरावा नष्ट करण्याचा प्रयत्न केल्या प्रकरणी भादवी कलम ३०२ व २०१ नुसार मयत रुपाली हिचा भाऊ रोहित संतोष मडके याने दिलेल्या फिर्यादीवरून गुन्हा दाखल करण्यात आला आहे.
गुजरातमधून आरोपी ताब्यात
या घटनेनंतर आरोपी ज्ञानदेव आमटे हा फरार झाला होता. आरोपीला शोधण्यासाठी पोलिसांची टीम कसून शोध घेत होते. दरम्यान आरोपी अहमदाबाद, गुजरात येथे असल्याची माहिती मिळताच पोलिसांचं पथक गुजरातला गेले. मात्र आरोपी सतत ठिकाण बदलत होता. मात्र पथकाने गुजरातमधील विविध ठिकाणचे हॉटेल, लॉजेस आणि टोल नाक्यावरील सीसीटीव्ही फुटेजच्या आधारे आरोपीचा शोध घेऊन त्याला ताब्यात घेतले. या घटनेचा अधिक तपास पोलीस निरीक्षक ज्ञानेश्वर भोसले यांच्या मार्गदर्शनाखाली पोलीस उपनिरीक्षक संपत कण्हेरे करत आहेत.
