राहुलकुमार अवचट
दौंड – यवत ते यवत स्टेशन रस्त्याची दुरावस्था झालेली असून, या रस्त्यात अनेक ठिकाणी शेकडो खड्डे पडले आहेत. या रस्त्यावरून जात असताना नागरिकांना जीव मुठीत धरून प्रवास करावा लागत आहे. यामुळे रस्त्याला नाही कोणी वाली? असा सवाल यवतकरांनी केला आहे.
यवतवरुन खामगाव मार्गे उत्तर भागात जाण्यासाठी हा जवळचा रस्ता आहे. या रस्त्यावरून तालुक्यातील खामगाव, दहिटणे, देवकरवाडी , मिरवडी , नांदुर या गावातील नागरिकांना विविध कामांसाठी यवत परिसरात यावे लागत आहे. परंतु या रस्त्याची दुरवस्था झाल्याने नागरिकांना वळसा घालून पर्यायी मार्गाचा अवलंब करावा लागत आहे.
यवत स्टेशन वरुन अनेक नोकरदार , विद्यार्थी ,शेतकरी पुणे शहराकडे जात असल्याने रस्त्यावरील रहदारी सतत चालू असते. परंतु सध्या रस्त्याची अवस्था खड्डेमय झाली असल्याने नागरिकांना अनेक समस्यांना तोंड द्यावे लागत आहे.
दरम्यान, काही वर्षापूर्वीच या रस्त्याचे काम झाले होते. या रस्त्यावर गजानन पतसंस्था, गुंड मैदान, गणेश कार्यालय , कालवा व स्टेशन स्मशानभुमी याठिकाणी लहान – मोठे खड्डे पडले आहे. यामुळे या रस्त्यावर अपघात होण्याची शक्यता नाकारता येत नाही.
सध्या पावसाळ्याचे दिवस सुरू असल्याने रस्त्याची झालेली दुरावस्था आणखी किती दिवस असीच राहणार आहे ? किती दिवस येथील नागरिकांना रस्त्याचा त्रास सहन करावा लागेल ? असे अनेक प्रश्न येथील नागरिकांना पडत आहेत.
