पुणे : विवाह नोंदणी संकेतस्थळावरुन दोघांची ओळख झाली. कालांतराने गोड बोलून त्याने तरुणीचा विश्वास संपादन केला. याच ओळखीतून तरुणीवर बलात्कार केल्याची घटना पुणे स्टेशन परिसरातील एका तारांकित हॉटेलमध्ये घडली आहे.
याप्रकरणी मिळालेल्या अधिक माहितीनुसार, गौरव पांडे उर्फ गौरव सारथी (वय २८, रा. मयूर विहार, दिल्ली) याच्याविरुद्ध गुन्हा दाखल करण्यात आला आहे. याबाबत तरुणीने बंडगार्डन पोलीस ठाण्यात फिर्याद दिली आहे.
विवाह नोंदणी संकेतस्थळावरुन तक्रारदार तरुणी आणि आरोपी गौरव यांची ओळख झाली. गौरवने गोड बोलून तरुणीला विवाहाचे आमिष दाखवले आणि तिच्याकडून ६२ हजार ७५६ रुपये उकळले. त्यानंतर गोड बोलून तिला पुणे स्टेशन परिसरातील एका तारांकित हॉटेलमध्ये भेटण्यास बोलाविले. तरुणावर विश्वास ठेवून, तरुणी तेथे भेटण्यासाठी गेली. त्यावेळी आरोपीने तिच्यावर बलात्कार केला. या प्रकरणाचा अधिक तपास पोलीस उपनिरीक्षक तांगडे करत आहेत.
