छत्रपती संभाजीनगर : संपूर्ण राज्यभरात मराठा आरक्षणावरून अनेक ठिकाणी हिंसक आंदोलन सुरू आहे. आता या हिंसक आंदोलनाचे लोण आता छत्रपती संभाजीनगर जिल्ह्यात देखील पोहचले आहे. भारतीय जनता पक्षाचे आमदार प्रशांत बंब यांचे गंगापूर शहरातील कार्यालय मराठा आंदोलकांनी फोडले आहे. यावेळी जमावाकडून कार्यालयातील सामानाची नासधूस करण्यात आली आहे. एकदम अचानक आलेल्याआंदोलकांनी बंब यांच्या कार्यालयाच्या काचा फोडल्या. तसेच खुर्च्या देखील तोडल्या आहेत .
मराठा आरक्षणावरून महाराष्ट्रात आंदोलन अधिक आक्रमक होताना पाहायला मिळत आहे. मराठवाड्यात अनेक ठिकाणी हिंसक आंदोलन होत आहे. विविध पक्षांच्या राजकीय नेत्यांना अडवून जाब विचारला जात आहे. तर, काही ठिकाणी तोडफोड देखील झाल्याचे पाहायला मिळत आहे. बीड जिल्ह्यातील आमदार प्रकाश सोळंके यांच्या घरावर दगडफेक केल्यानंतर आता छत्रपती संभाजीनगर जिल्ह्यातील भाजप आमदार प्रशांत बंब यांच्या कार्यालयाची तोडफोड करण्यात आली आहे. यावेळी आंदोलकांनी जोरदार घोषणाबाजी देखील केली.
