सागर जगदाळे
भिगवण: तक्रारवाडी (ता. इंदापूर) येथील गौरी सजावटीतून भारतीय स्वातंत्र्याचा अमृत महोत्सवाचा देखावा तयार करण्यात आला आहे.
तक्रारवाडी येथील विलास तुकाराम गडकर यांच्या घरी दरवर्षी ज्येष्ठा गौरींचे अर्थात महालक्ष्मीचे सोनपावलांनी आगमन होते. ते दरवर्षी घरातील गौरीं सजावट अनोख्या पद्धतीने करतात. त्यांनी यावर्षी भारतीय स्वातंत्र्याला ७५ वर्षे पूर्ण झाल्याबद्दल यावर्षी गौरी सजावटी मधून क्रांतिकारकांना अभिवादन करण्यासाठी भारतीय स्वातंत्र्य लढ्याचा इतिहास देखाव्यातून मांडला आहे.
यामध्ये प्रामुख्याने भारतमाता , क्रांतिकारकांची चित्रे , माहिती , मूर्ती, स्वातंत्र्यलढ्यातील घोषणा, रांगोळी यांची सुबक मांडणी करण्यात आली आहे. तसेच पंतप्रधान नरेंद्र मोदी यांनी केलेले “हर घर तिरंगा” हे आवाहन आपणाला देखाव्यातून साकारलेले पहायला मिळत आहे.
दरम्यान, ग्रामीण भागातील महिलांना भारतीय स्वातंत्र्य चळवळीचा इतिहास माहिती व्हावा. व महिलांमध्ये देशभक्ती निर्माण व्हावी. म्हणून या सजावटीचे आयोजन करण्यात आले आहे. असे रेश्मा गडकर यांनी सांगितले. तर सजावट करण्यासाठी सुषमा गडकर व स्नेहल गडकर यांचे सहकार्य लाभले.
