जांबूत, ता.०२ : सांसद आदर्श ग्राम जांबूत चे सुपुत्र तथा डिजिटल सात बाराचे प्रणेते उपजिल्हाधिकारी रामदास जगताप यांना पुणेकर मित्र परिवार तर्फे जीवन गौरव पुरस्काराने सोमवारी (ता.०२) गौरविण्यात आले आहे.
डॉ. बाबासाहेब आंबेडकर सांस्कृतिक भवन पुणे येथे आयोजित स्नेहमेळावा व यशवंत सन्मान सोहळ्यात पारनेर विधानसभा मतदार संघाचे लोकनेते आमदार निलेश लंके यांचे शुभहस्ते हा पुरस्कार प्रदान करण्यात आला. यावेळी गरीबाला न्याय द्या, वंचितांचे अश्रू पुसा, माणसातला देव शोधा आणि पुण्याचं पारडं जड करा असा कळकळीचा संदेश लंके यांनी आपल्या भाषणातून दिला.
त्यानंतर रामदास जगताप यांनी आपल्या आव्हानात्मक महसुली सेवाकालाचा आढावा घेत सहकार्य केलेल्यांची कृतज्ञता व्यक्त केली. महसूल विभागाच्या डिजीटल क्रांती ठरलेल्या ई फेरफार प्रकल्पाचा राज्य समन्वयक म्हणून सलग ६ वर्षे केलेले काम निश्चितीच समाधान देणारे होते. त्यामुळे लाखो नागरिक दररोज लाभ घेत आहेत असे प्रतिपादन श्री रामदास जगताप यांनी केले
दरम्यान, राष्ट्रपती पुरस्कार प्राप्त आदर्श शिक्षक बाळासाहेब घोडे गुरुजी यांचाही यावेळी सन्मान करण्यात आला. समाजरक्षक पोलीस कर्मचारी अधिकारी तसेच लोकसेवा आयोग परीक्षेत यश मिळवून निवड झालेले अधिकारी, उच्च शिक्षण घेतलेले डॉक्टर्स आणि शिष्यवृत्ती प्राप्त विद्यार्थ्यांचाही या प्रसंगी सन्मान करण्यात आला.
यावेळी शिरुर नगरपालिका नगराध्यक्षा मनिषाताई गावडे, अनिता रामदास जगताप, सेवानिवृत्त पोलीस उपायुक्त बाबाजी गावडे, जितेश सरडे, संतोष चव्हाण, सेवा निवृत्त उप मुख्य कार्यकारी अधिकारी प्रभाकर गावडे, जनता सह बैंक संचालक बीरुशेठ खोमणे संजय पिंगट, संभाजी साबळे, राजू खिलारे, नवनाथ निचित, तुकाराम डफळ, महेंद्र पवार, महेंद्र गुंजाळ,अभय नांगरे आदी मान्यवर मोठ्या संख्येने उपस्थित होते. या समारंभाचे प्रास्ताविक संभाजी साबळे यांनी करीत उपस्थितांचे स्वागत केले. राज शिनारे यांनी या कार्यक्रमाचे सूत्रसंचालन केले. तर सुनिल चोरे यांनी आभार मानले.
