अक्षय भोरडे
तळेगाव ढमढेरे, ता.२८ : धानोरे (ता. शिरुर) येथील विद्युत प्रवाह शनिवारी (दि.२६) पहाटेच्या सुमारास बंद झाल्याने विद्युत वितरणचे काही कर्मचारी या ठिकाणी पाहणी करण्यासाठी गेले असता त्यांना त्या ठिकाणचे विद्युत रोहित्र जमिनीवर पडलेले आणि त्यामधील तांब्याच्या तारा गायब असल्याचे निदर्शनास आले.
यावेळी पाहणी केली असता सदर रोहित्र फोडून त्यातील तांब्यांच्या तारांची अज्ञात व्यक्तीने चोरी केल्याचे समोर आल्याने विद्युत वितरण विभागाचे वरिष्ठ तंत्रज्ञ सुनील प्रकाश हेलोडे (वय ४२ वर्षे रा. तळेगाव ढमढेरे ता. शिरुर जि. पुणे) यांनी शिक्रापूर पोलीस स्टेशन येथे फिर्याद दिली.
याप्रकरणी शिक्रापूर पोलिसांनी अज्ञात चोरट्याविरोधात गुन्हा दाखल केला असून, पुढील तपास पोलीस निरीक्षक प्रमोद क्षीरसागर यांच्या मार्गदर्शनाखाली पोलीस नाईक संतोष मारकड हे करत आहे.
