अक्षय भोरडे
Shirur News : तळेगाव ढमढेरे : सणसवाडी (ता. शिरुर) येथे ट्रकचालक ट्रक कंपनीमध्ये लावून मोटारसायकलवर घरी जात होता. त्यावेळी तिघा युवकांनी दुचाकीवरून येऊन ट्रक चालकाला कट का मारला असे म्हणून सणसवाडी येथे मारहाण करत पुन्हा पिंपळे जगताप येथे घेऊन जात बेदम मारहाण केल्याची घटना घडली.
तिघांवर गुन्हा दाखल
याप्रकरणी शिक्रापूर पोलीस स्टेशन येथे अभिजित अंकुश नाईकनवरे, सागर रामदास जाधव, अजय शिंदे या तिघांवर गुन्हा दाखल करण्यात आला आहे.
सणसवाडी (ता. शिरुर) येथून ट्रकचालक नामदेव कदम हे ट्रक कंपनीमध्ये खाली करण्यास लावून मोटारसायकल घेऊन घरी चालले असताना एल अँड टी फाटा या ठिकाणी तळेगाव बाजूने दुचाकीहून तिघेजण आले. त्यांनी कदम यांना ‘तुला गाडी नीट चालवता येत नाही का’ असे म्हणून शिवीगाळ, दमदाटी करत मारहाण केली. त्यांनतर कदम यांनी तुम्ही कुठले असे म्हटले असता तिघांनी आम्ही पिंपळे जगतापचे असे म्हटल्याने कदम यांनी बाळासाहेब ढोकले यांचे नाव सांगितले.
दरम्यान, तिघांनी चल त्यांच्याकडे असे म्हणून कदम यांना पिंपळे जगताप या ठिकाणी घेऊन जात एका पेट्रोल पंपाजवळ पुन्हा बेदम मारहाण करुन जखमी केले. घडलेल्या प्रकाराबाबत नामदेव दत्तात्रय कदम (वय वय ४० वर्षे रा. पेरणे ता. हवेली जि. पुणे) यांनी शिक्रापूर पोलीस स्टेशन येथे फिर्याद दिल्याने शिक्रापूर पोलिसांनी अभिजित अंकुश नाईकनवरे व सागर रामदास जाधव (दोघे रा. पिंपळे जगताप ता. शिरुर जि. पुणे), अजय शिंदे (रा. वाजेवाडी ता. शिरुर जि. पुणे) यांच्या विरुद्ध गुन्हा दाखल केला असून, पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस उपनिरीक्षक आजिनाथ शिंदे हे करत आहे.
