Pune News : पुणे : शिधापत्रिकाधारकाधारकांसाठी एक आनंदाची बातमी आहे. राज्य सरकारकडून अवघ्या शंभर रुपयांत मिळणारा ‘आनंदाचा शिधा’ आता गणेशोत्सवासह दिवाळीत देखील मिळणार आहे. त्याचा लाभ शहरातील तीन लाख ३३ हजार, तर जिल्ह्यातील पाच लाख ७४ हजार अशा नऊ लाख सात हजार शिधापत्रिकाधारकांना मिळणार आहे.
१०० रुपयांत हा शिधा..
शिंदे-फडणवीस सरकार स्थापनेच्या वर्षपूर्तीनिमित्त सरकारने गेल्या वर्षी दिवाळीला ‘आनंदाचा शिधा’ देण्याचा उपक्रम सुरू केला. गुढीपाडवा आणि डॉ. बाबासाहेब आंबेडकर जयंतीनिमित्ताने हा शिधा देण्याचे सरकारने जाहीर केले होते. अवघ्या १०० रुपयांत हा शिधा देण्यात येणार आहे. त्याचा लाभ जिल्ह्यातील सुमारे आठ लाख ९० हजार शिधापत्रिकाधारकांना झाला होता. अंत्योदय आणि प्राधान्य कुटुंब योजनेतील शिधापत्रिकाधारकांना एक किट याप्रमाणे हे शिधावाटप होणार आहे.
केशरी कार्डधारक अर्थात शिक्षापत्रिकाधारकांना १०० रुपयांत १ किलो रवा, १ किलो चना डाळ, १ किलो साखर तसेच १ लीटर पामतेल असा आनंदाचा शिधा मिळतो. यापूर्वी ई-पॉसद्धारे १०० रुपये प्रतिसंच असा सवलतीच्या दरात हा शिधा दिला जात होता. ई-पॉसची व्यवस्था नसलेल्या ठिकाणी ऑफलाईन पद्धतीने हा शिधा दिला जातो. शहरात तीन लाख २९ हजार ९०७ प्राधान्य कुटुंब लाभार्थी आहेत. अंत्योदय योजनेतील सात हजार ३७० लाभार्थ्यांना त्याचा फायदा होणार आहे. त्यासाठी तीन लाख ३७ हजार २७७ किटची शहरात मागणी करण्यात आली आहे.
दरम्यान, पाडव्याला शहरात तीन लाख १७ हजार ८८१ शिधापत्रिकाधारकांना आनंदाचा शिधा वाटप करण्यात आला होता. त्यात आता वाढ झाली आहे. त्यानुसार सरकारकडे किटची मागणी केली आहे, असे शहराचे अन्नधान्य वितरण अधिकारी दादासाहेब गिते यांनी सांगितले.
या योजनेबाबत माहिती देताना जिल्ह्याच्या अन्नधान्य पुरवठा अधिकारी डॉ. सीमा होळकर म्हणाल्या की, आनंदाचा शिधा वाटप ‘ई-पॉस’द्वारे दिला जाईल. ‘ई-पॉस’ची व्यवस्था नसलेल्या ठिकाणी ऑफलाइन पद्धतीने हा शिधा दिला जाईल. जिल्ह्यात गेल्या वेळी एकूण पाच लाख ६० हजार ६१९ जणांना याचा लाभ मिळाला होता. जिल्ह्यात प्राधान्य कुटुंबातील पाच लाख ४० हजार ७४४; तसेच ४८ हजार ५७० एवढे अंत्योदय योजनेचे लाभार्थी आहेत. त्यानुसार पाच लाख ८९ हजार ३१४ एवढे लाभार्थी आहेत; परंतु गणेशोत्सवासाठी पाच लाख ७४ हजार ५९ एवढ्या किटची मागणी सरकारकडे केली आहे. पाडव्याला वाटप झालेल्या शिधा किटच्या संख्येनुसार ही मागणी राज्य सरकारकडे नोंदवली आहे.
