Crime News | पुणे : घरगुती कारणावरून सून व तिच्या सासूचा वाद झाला. या वादातून सून व तिच्या नातेवाईकांनी घरात शिरुन सासूला मारहाण करुन दागिने चोरुन नेन्याची घटना समोर आली आहे. याप्रकरणी सूनेसह पाच जणांवर खडक पोलिसांनी दरोड्याचा गुन्हा दाखल केला आहे. ही घटना घोरपडी पेठेतील रोलॅक्स बेकरीवरील घरात २२ एप्रिल रोजी रात्री ११ वाजता घडला.
याबाबत सलमा अक्रम अन्सारी (वय ५६, रा. घोरपडी पेठ) यांनी खडक पोलीस स्टेशनमध्ये फिर्यादे दिली आहे. त्यानुसार पोलिसांनी फिर्यादी यांची सून फराना अन्सारी, तिची आई आबिदा अन्सारी, तिचे वडिल मोहम्मद अली अन्सारी, भाऊ फेज अन्सारी व कैफ अन्सारी आणि इतर पाच जणांविरुद्ध गुन्हा दाखल केला आहे.
पोलिसांनी दिलेल्या माहितीनुसार, फिर्यादी आणि आरोपी फराना या सासू, सुना आहेत. त्यांच्यात घरगुती भांडणे आहेत. त्यांची सून फराना अन्सारी ही आपल्या आईवडिल व इतरांना घेऊन फिर्यादीच्या घरी आली. त्यांनी फिर्यादी यांना हाताने मारहाण केली.
कैफ याने फिर्यादीच्या गळ्यातील ९० हजार रुपयांची १८ ग्रॅम वजनाची सोन्याची चैन खेचून घेतली. कपाटातील ७० हजार रुपये रोख व १२ ग्रॅम वजनाचे ६० हजार रुपयांचे सोन्याचे दागिने जबरदस्तीने घेऊन गेले.
त्यांच्याबरोबर असलेल्या पाच जणांनी फिर्यादीच्या मालकीच्या रोलॅक्स बेकरीतील सामानाचे व वस्तुंची तोडफोड करुन नुकसान केले. सहायक पोलीस निरीक्षक जाधव तपास करीत आहेत.
