पुणे : वेस्ट इंडिजवरील वर्चस्व कायम राखताना शनिवारी चौथा ट्वेन्टी-२० क्रिकेट सामना जिंकून पाच सामन्यांच्या मालिकेत विजयी आघाडी मिळवण्याचे भारतीय संघाचे लक्ष्य असेल.
कॅरेबियन बेटांवर झालेल्या पहिल्या तीन ट्वेन्टी-२० सामन्यांत रोहित शर्माच्या नेतृत्वाखालील भारतीय संघाने उत्तम कामगिरी केली. त्यांना मालिकेत २-१ अशी आघाडी मिळवण्यात यश आले असून पुढील दोन्ही सामने अमेरिकेतील फ्लोरिडा येथे रंगणार आहेत. हे दोन्ही सामने जिंकून आगामी आशिया चषक स्पर्धेसाठी आपण पूर्णपणे सज्ज असल्याचे सिद्ध करण्याचा भारताचा प्रयत्न असेल.
विंडीजविरुद्ध तिसऱ्या ट्वेन्टी-२० सामन्यात ११ धावांवर फलंदाजी करत असताना पाठीच्या दुखापतीमुळे भारताचा कर्णधार रोहित शर्माला मैदानाबाहेर जावे लागले होते. मात्र, तिसऱ्या आणि चौथ्या सामन्यादरम्यान तीन दिवसांचे अंतर असल्याचा रोहितला फायदा झाला आहे. तो तंदुरुस्त झाला असून उर्वरित दोन सामन्यांसाठी उपलब्ध आहे.
भारतीय संघ :
रोहित शर्मा, सूर्यकुमार यादव, श्रेयस अय्यर, दीपक हुड्डा, हार्दिक पांड्या, ऋषभ पंत, इशान किशन, दिनेश कार्तिक, संजू सॅमसन, रविंद्र जडेजा, अक्षर पटेल, रविचंद्रन अश्विन, रवी बिश्नोई, कुलदीप यादव, अर्शदीप सिंह, आवेश खान, भुवनेश्वर कुमार, हर्षल पटेल.
आज संध्याकाळी : रात्री ८ वा.
थेट प्रक्षेपण : फॅनकोड अ‍ॅप, डीडी स्पोर्ट्सवर
