Pune Crime | पुणे : मोटारचालकाने पीएमपी चालकाला मारहाण केल्याची घटना मुंढवा भागात घडली. पाठिमागून बसलाच कारने धडक दिली अन् तुला गाडी नीट चालवता येत नाही का म्हणत पीएमपी चालकालाच मारहाण केली.
याप्रकरणी चालक इरबा मारुती इबीतदार (वय ३०, रा. केसनंद रस्ता, वाघोली) यांनी मुंढवा पोलीस ठाण्यात तक्रार दिली आहे. त्यानूसार, अनोळखी कार चालकाविरोधात गुन्हा नोंद केला आहे.
मिळालेल्या माहितीनुसार, मगरपट्टा-मुंढवा रस्त्याने पीएमपी चालक इबीतदार सकाळी सव्वा दहाच्या सुमारास निघाले होते. त्यावेळी मुंढवा चौकात बस थांबली. पाठीमागून आलेल्या मोटार पीएमपी बसवर आदळली.
त्यावेळी मोटारचालक मोटारीतून बाहेर आला. तुला बस नीट चालविता येत नाही का?, अशी विचारणा करुन मोटारचालकाने पीएमपी चालक इबीतदार यांना शिवीगाळ करण्यास सुरुवात केली. इबीतदार यांना मारहाण करुन मोटारचालक पसार झाला.
पसार झालेल्या मोटारचालकाचा शोध घेण्यात येत असून पोलीस उपनिरीक्षक प्रमोद कोळेकर तपास करत आहेत.
अधिक बातम्या वाचण्यासाठी येथे क्लिक करा…!
