पुणे : शिवसेनेचे फायरबँड नेते खासदार संजय राऊत यांच्या घरावर रविवारी पहाटेपासुनच सक्तवसुली संचलनालय म्हणजेच ईडीची (ED) चे दहाहुन अधिकारी दाखल झाले आहेत. त्याच संजय राऊच यांच्या दुसऱ्या घरावरही ईडीने रेड टाकल्याच्या बातम्या पुढे येत आहेत. खासदार संजय राऊत हे ईडीच्या चौकशीला वारंवार गैरहजर रहात असल्याने, ईडीचे अधिकारी राऊतांच्या घरी पोहोचले असल्याचं बोललं जात आहे.
पत्राचाळ पुनर्विकासातील आर्थिक गैरव्यवहारप्रकरणी ईडीने ही धाड टाकल्याची माहिती आहे. त्यामुळे ईडीची (ED) ने ज्या “पत्राचाळ घोटाळा” मुळे धाड टाकली, तो पत्राचाळ घोटाळा आहे तरी नेमका काय ते पाहु..
गोरेगाव हद्दीतील पत्राचाळ जमीन घोटाळा एक हजार ३४ कोटी रुपयांचा असल्याचा आरोप आहे. पत्राचाळीत महाराष्ट्र गृहनिर्माण आणि क्षेत्र विकास प्राधिकरणाचा (म्हाडा) भूखंड आहे. ‘ईडी’च्या आरोपानुसार, बारा वर्षापुर्वी प्रवीण राऊत यांच्या गुरू आशिष कन्स्ट्रक्शन कंपनीला ही चाळ विकसित करण्याचे काम देण्यात आले होते. मात्र त्यांनी या जागेचा काही भाग खासगी विकासकांना विकला, असा आरोप आहे.
प्रवीण राऊत यांच्यावर पत्राचाळमध्ये राहणाऱ्या नागरिकांची फसवणूक केल्याचा आरोप केला आहे. गुरु आशिष कन्स्ट्रक्शनला पत्रा चाळचे ३ हजार फ्लॅट बांधकाम करायचे होते. त्यापैकी ६७२ फ्लॅट येथील भाडेकरूंना, तरउर्वरित फ्लॅट म्हाडा आणि विकासक यांच्यात वाटून घ्यायचे होते. परंतु, २०१० मध्ये प्रवीण राऊत यांनी गुरू आशिष कन्स्ट्रक्शन कंपनीचे २५८ टक्के शेअर एचडीआयएलला विकले. यानंतर २०११, २०१२ तसेच २०१३ मध्ये भूखंडाचे अनेक भाग इतर खासगी विकासकांना हस्तांतरित केल्याचा आरोप ईडीने केलेला आहे.
गुरू आशिष कन्स्ट्रक्शन कंपनीचे प्रवीण राऊत हे संजय राऊतांचे निकटवर्तीय…
‘ईडी’ने पत्राचाळ घोटाळा प्रकरणात यापुर्वीच प्रवीण राऊत यांना ताब्यात घेऊन, चौकशी नंतर अटक केलेली आहे. प्रवीण राऊत हे गुरू आशिष कन्स्ट्रक्शन प्रायव्हेट लिमिटेडचे संचालक आहेत. या कंपनीने म्हाडाच्या जमिनीवर वसलेल्या पत्राचाळीचा पुनर्विकास करण्यासाठी म्हाडाशी करार केला होता. ही चाळ तब्बल ४७ एकरांवर वसली असून तेथे ६२७ भाडेकरू आहेत. या सर्वांसाठी घरे बांधून ती म्हाडाला दिली जावीत, असा करार २०१०मध्ये करण्यात आला होता.
त्यानंतर प्रवीण राऊत यांनी हौसिंग डेव्हलपमेंट अॅण्ड इन्फ्रास्ट्रक्चरचे (एचडीआयएल, डीएचएफएफ समूहातील कंपनी) राकेश वाधवान, सारंग वाधवान व अन्य संचालकांना हाताशी घेत या चाळ पुनर्विकासापोटी मिळणाऱ्या चटई क्षेत्र निर्देशांकाची (एफएसआय) परस्पर अन्य बांधकाम विकासकांना विक्री केली. याद्वारे त्यांनी बेकायदा तब्बल १,०७४ कोटी रुपये जमवले. त्याचवेळी पत्राचाळीचा एक इंचही पुनर्विकास केला नाही. त्याशिवाय याआधारे त्यांनी बँकेतूनही ९५ कोटी रुपयांचे कर्ज मिळवले.
प्रवीण राऊत यांनी “पत्राचाळ घोटाळा” प्रकरणातील कोट्यवधी रुपये इतर खात्यात वळवल्याचा आरोप…
दरम्यान प्रवीण राऊत यांनी “पत्राचाळ घोटाळा” प्रकरणातील कोट्यवधी रुपये त्यांचे मित्र, कुटुंबीय यांच्या विविध खात्यात वळते केल्याचा आरोप ईडीने केलेला आहे. यापैकीच ८३ लाख रुपये खासदार संजय राऊत यांच्या पत्नी वर्षा राऊत यांच्या खात्यात जमा केल्याचा आरोप ईडीने केला आहे. यातुन संजय राऊत यांच्यावर सध्याचे धाडसत्र ईडीने सुरु केलेले आहे. प्रवीण राऊत यांनी पाठवलेल्या पैशातुनच संजय राऊत यांच्या पत्नी, वर्षा राऊत यांनी दादर येथे फ्लॅट घेतला, असा ‘ईडी’चा संशय आहे.
याप्रकरणी वर्षा राऊत यांनाही ‘ईडी’ने नोटीस बजावली होती. त्यावेळी वर्षा यांनी ५५ लाख रुपये माधुरी यांना परत केले. परंतु त्यानंतर ‘ईडी’ने एप्रिल महिन्यात पालघरमधील जमीन, दादर येथील फ्लॅट व किहीम येथील आठ भूखंडांवर टाच आणली. यांतील भूखंड व जमीन प्रवीण राऊत यांच्या मालकीची आहे. तर दादर येथील फ्लॅट वर्षा संजय राऊत यांच्या मालकीचा आहे. तर काही भूखंड हे वर्षा राऊत व स्वप्ना सुजित पारकर यांच्या नावे आहेत.
