पुणे : एका संगणक अभियंत्याने नोकरीच्या आमिषाने आठ तरुणांची ११ लाख ३० हजार रुपयांची फसवणूक केल्याची धक्कदायक घटना उघडकीस आली असून याप्रकरणी संगणक अभियंत्याला चतु:शृंगी पोलिसांनी अटक केली आहे.
श्रीकांत बालाजी बिरादार (वय ३०, रा. लिलियन अपार्टमेंट, वाकड) असे अटक करण्यात आलेल्या संगणक अभियंत्याचे नाव आहे. प्रदीप माणिक भुजबळ (वय २८, रा. लादवड, ता. खेड, जि. पुणे) असे फिर्याद दिलेल्या तरुणाचे नाव आहे.
पोलिसांनी दिलेल्या माहिती नुसार, आरोपी बिरादार संगणक अभियंता असून, त्याने बालेवाडीतील हायस्ट्रीट परिसरात फ्रेशर जॉब हंट नावाने कंपनी स्थापन केली होती. माहिती-तंत्रज्ञान कंपनीत नोकरी मिळवून देण्याचे आमिष त्याने तरुणांना दाखविले. त्याने फिर्यादी भुजबळ याच्यासह आठ तरुणांकडून नोकरीच्या आमिषाने ११ लाख ३० हजार रुपये उकळले .
त्यानंतर भुजबळ याच्यासह आठ जणांना नोकरी मिळवून दिली नाही. फसवणूक झाल्याचे लक्षात आल्यानंतर भुजबळ याच्यासह आठ तरुणांनी पोलिसांकडे तक्रार दिली.
त्यानंतर आरोपी श्रीकांत बिरादार याला चतु:शृंगी पोलिसांनी अटक केली आहे. बिरादारने आणखी दहा ते पंधरा तरुणांची फसवणूक केल्याची शक्यता असून या घटनेचा पुढील तपास पोलीस करीत आहेत.
