सोलापूर : सोलापूर जिल्ह्याच्या मंगळवेढा तालुक्यातील नंदेश्वर गावात मंगळवारी (दि. २१) दुपारी एकच्या सुमारास एकाच कुटुंबातील तीन महिलांच्या डोक्यात दगड घालून हत्या केल्याची घटना घडली असून या घटनेमुळे तालुक्यात एकच खळबळ उडाली आहे.
दीपाली बाळू माळी (वय- २५), पारूबाई बाबाजी माळी (वय- ४५), संगीता महादेव माळी (वय – ५०) अशी खून झालेल्या महिलांची नावे आहेत. या तिन्ही महिला त्यांच्या घरासमोरील अंगणात गंभीर अवस्थेत आढळून आल्या. हत्येचे कारण अद्याप अस्पष्ट असल्याचे पोलिसांनी सांगितले आहे.
पोलिसांनी दिलेल्या माहितीनुसार, मंगळवेढा तालुक्याच्या दक्षिण भागात असलेल्या नंदेश्वरमध्ये मंगळवारी दुपारी एकच्या सुमारास ही घटना घडली. घटनेची माहिती मिळताच सोलापूर ग्रामीणचे पोलीस अधीक्षक शिरीष सरदेशपांडे यांच्यासह वरिष्ठ पोलीस अधिकारी घटनास्थळी दाखल झाले.
या घटनेनंतर पोलिसांनी तपासाची सूत्रे वेगाने हलवताना ३० वर्षाच्या संशयित तरुणाला ताब्यात घेतले. या तिन्ही महिलांच्या डोक्यात दगड घालून त्यांना संपवले असल्याची शक्यता पोलिसांकडून वर्तवली जात आहे. याबाबत काही संशयित व्यक्तीना पोलिसांनी ताब्यात घेतले आहे. शेजारी राहणाऱ्या वादांमधूनच ही घटना घडल्याचे बोलले जात असले तरी देखील पोलिसांनी याला दुजोरा दिला नाही.
दरम्यान, त्या तरुणामध्ये व एका महिलेमध्ये किरकोळ कारणावरुन भांडण झाले होते. हे भांडण सोडवण्यासाठी आलेल्या महिलेसह अन्य एका महिलेच्या डोक्यात तीक्ष्ण हत्याराने वार केल्याची प्राथमिक माहिती पोलिसांनी दिली.
