पुणे : लकी ड्रॉ चे कूपन विकण्याच्या बहाण्याने जेष्ठ दाम्पत्याचे हात-पाय बांधून तीन चोरट्यांनी घरातील अडीच लाखाच्या दागिन्यांवर डल्ला मारल्याची धक्कादायक घटना जाधवमळा (ता. आंबेगाव) येथे नुकतीच उघडकीस आली आहे.
गोविंद भगवंत जाधव (वय-७७) व नंदा गोविंद जाधव (वय-७०) असे हात-पाय बांधलेल्या जेष्ठ दाम्पत्यांचे नाव आहे. याप्रकरणी दाम्पत्याने पारगाव फॅक्टरी पोलिस ठाण्यात तक्रार दिली आहे. त्यानुसार अज्ञात तीन चोरट्यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, जाधवमळा येथील पोंदेवाडी रोडवर गोविंद जाधव यांचे घर आहे. त्यांच्या जवळपास दुसरे कोणाचेही घर नाही. गोविंद जाधव आणि त्यांची पत्नी नंदा हे एकटेच घरात राहतात. तर त्यांची मुले व नातवंडे गावाबाहेर आहेत.
दरम्यान, जाधव यांच्या घरी दोन तरुण लकी ड्रॉ कूपन विकण्याच्या बहाण्याने आले होते. त्या दोघांशिवाय घरात दुसरे कोणी आले नसल्याचे त्यांनी घर तपासले असावे. चोरट्यांनी घराच्या दरवाजाला लाथ मारून आत प्रवेश केला. आणि चोरट्यांनी जेष्ठ दाम्पत्याचे हात-पाय बांधले.
त्यानंतर चोरट्यांनी जाधव यांच्या हातातून दीड तोळे वजनाची सोन्याची अंगठी व दुसरी अर्धा तोळा वजनाची सोन्याची अंगठी व नंदा जाधव यांच्या गळ्यातील दोन तोळे वजनाचे दोन सोन्याचे मंगळसूत्र, अर्धा तोळा वजनाची सोन्याची अंगठी व अर्धा तोळा वजनाचे सोन्याचे कर्णफुल, नथ आणि पाच हजार रुपयांची रोकड असा मुद्देमाल चोरून नेला.
