पुणे : पुणे शहराकडून उत्तर अमेरिकेतील सॅन होजे या शहराला भेट म्हणून देण्यात आलेला छत्रपती शिवाजी महाराजांचा पुतळा चोरी गेल्याची माहिती आहे. उत्तर अमेरिकेतील छत्रपती शिवाजी महाराजांचा एकमेव पुतळा कॅलिफोर्नियातील सॅन जोस शहरातील एका उद्यानातून चोरीला गेल्याचे समोर आले आहे.
सॅन होजे येथील पार्क, रिक्रिएशन आणि नेबरहूड सव्‍‌र्हिसेस विभागाने शुक्रवारी (ता.३) याबद्दल ट्विट करत माहिती दिली.
उत्तर अमेरिकेत असलेला हा छत्रपती शिवाजी महाराजांचा एकमेव पुतळा होता. शहरातील ग्वाडालुपे रिव्हर पार्कमधून या उद्यानातून हा पुतळा कधी चोरी झाला याबद्दल माहिती मिळू शकली नाही, असे स्थानिक दूरचित्रवाणी वाहिनी केटीव्हीयूने आपल्या बातमीमध्ये सांगितले आहे.
दरम्यान, या पुतळ्याच्या चोरीमुळे शहरवासीयांना खूप दुःख झाले आहे, असे विभागाने त्यांच्या ट्विटमध्ये म्हटले आहे. तसेच, पुतळ्याचा शोध घेण्यासाठी आम्ही प्रयत्न काम करत आहोत आणि लवकरच याबद्दल माहिती देऊ. अधिकारी या प्रकरणाची चौकशी करत आहेत आणि या कामात नागरिकांची मदत घेतली जात असल्याचे विभागाच्या अधिकाऱ्यांनी माहिती दिली आहे.
