पुणे : रावेत येथील सोसायटीच्या जागेची ७/१२ उता-यावर नोंद करण्यासाठी ३५ हजार रुपयांच्या लाचेची मागणी केल्याप्रकरणी किवळे (ता. हवेली) तलाठी कार्यालयात मदतनीस म्हणून काम करणा-या इसमावर देहूरोड पोलीस ठाण्यात मंगळवारी (ता.७) गुन्हा दाखल करण्यात आला आहे.
नितीन ढमाले (किवळे तलाठी कार्यालय, देहुरोड, पुणे येथे मदतनीस) असे गुन्हा दाखल झालेल्या इसमाचे नाव आहे. याप्रकरणी एका ३३ वर्षीय व्यक्तीने पुणे लाचलुचपत प्रतिबंधक विभागाकडे तक्रार दिली होती.
लाचलुचपत प्रतिबंधक विभागाने दिलेल्या माहितीनुसार, रावेत येथील सोसायटीच्या जागेची नोंद ७/१२ उता-यावर करण्यासाठी किवळे तलाठी कार्यालयात मदतनीस म्हणुन काम करणारे नितीन ढमाले यांनी तक्रारदार यांच्याकडे ३५ हजार रुपयांच्या लाचेची मागणी केली होती. याप्रकरणी तक्रारदार यांनी लाचलुचपत प्रतिबंधक विभागाकडे तक्रार दिली होती.
सदर तक्रारीची लाचलुचपत प्रतिबंधक विभागाने पडताळणी केली असता, किवळे तलाठी कार्यालयामध्ये मदतनीस म्हणून काम करणारे नितीन ढमाले यांनी तक्रारदाराकडे किवळे तलाठी यांच्यासाठी ३५ रुपये लाचेची मागणी केली असल्याचे निदर्शनास आले. म्हणून लाच मागणीचा गुन्हा आरोपी नितीन ढमाले याच्यावर देहूरोड पोलीस ठाण्यात मंगळवारी (ता.७) गुन्हा दाखल करण्यात आला आहे. पुढील तपास लाचलुचपत प्रतिबंधक विभागाचे पोलीस निरीक्षक संदिप वऱ्हाडे करीत आहेत.
सदरची कारवाई पोलीस उप आयुक्त/ पोलीस अधीक्षक अमोल तांबे, अपर पोलीस अधीक्षक सुरज गुरव यांच्या मार्गदर्शनाखाली पुणे लाचलुचपत प्रतिबंधक विभागाने केली आहे.
दरम्यान, कोणताही शासकीय अधिकारी, कर्मचारी / लोकसेवकाने लाचेची मागणी केल्यास त्याबाबत लाचलुचपत प्रतिबंधक विभाग पुणे कार्यालयास ०२०-२६१२२१३४, २६१३२८०२,२६०५०४२३ या दूरध्वनी क्रमांकवर संपर्क साधावा. असे आवाहन लाचलुचपत प्रतिबंधक विभागाचे पोलीस अधीक्षक अमोल तांबे यांनी केले आहे.
