पुणे : नोकरी देण्याच्या आमिषाने कंपनी मालकाने एका १९ वर्षीय तरुणीवर बलात्कार करून तिचे फोटो व्हायरल करण्याची धमकी दिल्याची घटना खेड तालुक्यातील महाळुंगे गावाच्या हद्दीत घडली आहे. तसेच पीडितेने पोलिसांत तक्रार देण्याचा इशारा दिला असता, कंपनी मालकाच्या मित्राने तिचा खून करण्याची धमकी दिली. याप्रकरणी महाळुंगे एमआयडीसी पोलिसांनी दोघांना ताब्यात घेतले आहे.
कंपनीचा मालक विजयकुमार जनार्दन पोतदार (वय-५५, रा. संकेश्वर डाईन आयकॉन, रावेत, पुणे) आणि त्याचा साथीदार मिथुन जोगेंदरकुमार दास (वय-२८, रा. सारा सिटीसमोर, खराबवाडी, ता. खेड) अशी अटक करण्यात आलेल्या दोघांची नावे आहेत. याप्रकरणी १९ वर्षीय तरुणीने महाळुंगे एमआयडीसी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, १९ वर्षीय तरुणीला नोकरीची गरज असल्याने ती नोकरीच्या शोधात होती. तिच्या मैत्रिणीने तिला विजयकुमार पोतदारच्या कंपनीबद्दल माहिती दिली. त्यानुसार सदर तरुणीने विजयकुमारशी संपर्क साधून नोकरीची गरज असल्याचे सांगितले. मात्र, विजयकुमारने कामाचे आमिष दाखवून फिर्यादीच्या इच्छेविरुद्ध तिच्यावर अत्याचार केला. तसेच, मोबाईलमध्ये तुझे फोटो आहेत, ते मी व्हायरल करीन, अशी धमकी दिली. त्यानंतर विजयकुमार हा वेगवेगळ्या मोबाईल नंबरवरून, तसेच वेगवेगळ्या लोकांमार्फत फोन करून फिर्यादीला त्रास देऊ लागला.
फिर्यादीने तुझी पोलीस स्टेशनला तक्रार करणार असल्याचे विजय कुमारला सांगितले. त्यावर विजयकुमारने त्याचा मित्र मिथुनला फिर्यादीचा मोबाईल नंबर दिला. मिथुनने फिर्यादीस फोन करून विजयकुमार बरोबर काय केले आहे, मला माहीत आहे. “तू जर त्याच्याविषयी कुणाला सांगितलेस, तर, तुझा खून करीन,” अशी धमकी दिल्याचे फिर्यादीत म्हटले आहे. या प्रकरणी सहायक पोलिस आयुक्त प्रेरणा कट्टे तपास करीत आहेत.
