पुणे : पुणे-नाशिक महामार्गावर अज्ञात वाहनाने पाठीमागून धडक दिल्याने दुचाकीवरील दोघांचा जागेवरच मृत्यू झाल्याची घटना कांदळी (ता. जुन्नर) हद्दीतील कांदळी फाटा-१४ नंबर येथे घडली.
जुल्फीकार दिलशाद मालिक (वय २२, रा. चुडियाला मोहनपूर, ता.रुडकी, जि. हरिद्वार, उत्तराखंड) आणि इस्तकार मलिक (रा. खाताखेडा, ता. रुडकी, जि. हरिद्वार, उत्तराखंड) अशी या अपघातात ठार झालेल्या दोघांची नावे आहेत. याबाबत सुहास जगन्नाथ घाडगे यांनी नारायणगाव पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, जुल्फीकार मालिक आणि इस्तकार मलिक हे दोघे फिर्यादी सुहास घाडगे यांच्या गुऱ्हाळ्यावर कामगार होते. बुधवारी सायंकाळी ७.३० वाजता ते कांदळी फाट्याहून १४ नंबरच्या दिशेने पुणे-नाशिक महामार्गाच्या सेवा रस्त्याने दुचाकीवरून निघाले होते.
यावेळी भरधाव वाहनाने कांदळी फाटा-१४ नंबर येथे बुलेटच्या गॅरेजसमोर त्यांच्या दुचाकीला पाठीमागून भरधाव आलेल्या वाहनाने जोरात धडक दिली. यामध्ये दोघांचाही जागीच मृत्यू झाल्याचे फिर्यादीत म्हटले आहे. त्यानुसार नारायणगाव पोलिसांनी अपघातास कारणीभूत ठरलेल्या वाहनधारकाच्या विरोधात गुन्हा दाखल केला आहे.
सहायक पोलीस निरीक्षक पृथ्वीराज ताटे यांच्या मार्गदर्शनाखाली हवालदार मोहरे पुढील तपास करत आहेत.
