पुणे : बँक कर्मचाऱ्यांना आठवड्यातून ५ दिवस वर्किंग असावे, यासह इतर मागण्यांसाठी युनायटेड फोरम ऑफ बँक युनियन्सने ३० आणि ३१ जानेवारीला संप करणार असल्याचे जाहीर केले आहे. संप असणाऱ्या दिवशी म्हणजेच ३० आणि ३१ जानेवारीला बँका बंद असणार आहे.
ऑल इंडिया बँक एम्प्लॉईज असोसिएशनचे जनरल सेक्रेटरी सीएच वेंकटचलम यांनी या संपाबाबत सांगितले, “आमच्या मागणी करणाऱ्या पत्राला ‘इंडियन बँक असोसिएशन’(IBA) कडुन कोणताही प्रतिसाद मिळाला नाही.
यासाठी ३० आणि ३१ जानेवारीला संप करण्याचा निर्णय घेण्यात आला आहे. बँक कर्मचारी दोन दिवसाच्या संपावर जाणार असल्याने सामान्य ग्राहकांना मोठ्या त्रासाला सामोरे जावे लागण्याची शक्यता.
बँक कर्मचाऱ्यांच्या मागण्या पुढील प्रमाणे :
बँक कर्मचारी युनियनने बँकिंग कामकाज पाच दिवसांचे करावे.
राष्ट्रीय पेन्शन योजना संपुष्टात आणावी.
पगार वाढीबाबतच्या वाटाघाटी सुरू कराव्यात.
बँकांमधील सर्व कॅडरमध्ये भरती प्रक्रिया लागू करावी, यांसह आदी मागण्या करण्यात आल्या आहेत.
नागरिकांची मोठी गैरसोय होणार?
बँक कर्मचाऱ्यांनी जानेवारी महिन्याच्या अखेरच्या आठवड्यातील पहिल्या दोन दिवशी संपाची हाक दिली आहे. म्हणजेच ३० आणि ३१ जानेवारी रोजी संप पुकारण्यात आला आहे. मात्र, त्यापूर्वी महिन्याचा चौथा आठवडा असल्याने बँकांना शनिवार आणि रविवार सुट्टी असते. त्यामुळे २८ व २९ जानेवारीलाही बँका बंद असतील.
परिणामी संपाचे दोन दिवस आणि विकेंडचे दोन दिवस असे मिळून एकूण चार दिवस बँका बंद राहणार आहे. त्यामुळे नागरिकांना मोठ्या गैरसोयीचा सामना करावा लागण्याची शक्यता आहे.
