लोणी काळभोर : वडकी (ता. हवेली) येथील लोटस गार्डन इंग्लिश मिडीयम स्कुल या इंग्रजी माध्यमाच्या शाळेत ‘महिला मुक्ती दिन’, ‘बालिका दिन’ मंगळवारी (ता.३) मोठ्या उत्साहात साजरा करण्यात आला.
विद्यालयात प्रथम क्रांतीज्योती सावित्रीबाई फुले यांच्या प्रतिमेस पुष्पहार अर्पण करून अभिवादन करण्यात आले. यावेळी रयत सेवा प्रतिष्ठानचे अध्यक्ष चंद्रकांत भोसले, सचिव शुभलक्ष्मी भोसले, उपाध्यक्षा आयुर्वेद व पंचकर्म तज्ञ डॉ.स्मिता फरांदे, दंतरोग तज्ञ डॉ.जयदीप फरांदे, दंत चिकित्सक डॉ.दीपा पलंगे, प्राचार्या कल्पना जांभुळकर, प्राचार्या वृषाली खामकर, व्यवस्थापक अजय काकडे, क्रीडा शिक्षक मुकुंद चव्हाण आदी यावेळी व्यासपीठावर उपस्थित होते.
यावेळी बोलताना चंद्रकांत भोसले म्हणाले, स्त्री शिक्षणाचा पाया रचणाऱ्या क्रांतीज्योती सावित्रीबाई फुले यांच्यामुळे मुलींना शिक्षणाचा अधिकार मिळाला, विविध क्षेत्रात मुली अग्रेसर आहेत लहान वयात मुलींना अनेक शारीरिक समस्या असतात. त्या त्यांना मांडता येत नाहीत. या समस्यांवर जनजागृती करण्यासाठी व उपाययोजना करण्यासाठी शाळेमध्ये प्रबोधनपर शिबिराचे आयोजन करण्यात आले आहे.
महिला कुटुंबाच्या आधारस्तंभ आहेत आणि या वयोगटात मुलींच्या आरोग्याची पायाभरणी करणे आवश्यक आहे, सावित्रीबाई फुले यांच्या जयंतीच्या दिनी बालिका दिन आणि महिला मुक्ती दिन साजरा करून महिलांना सक्षम करण्याचे पाऊल उचलले आहे. असेही भोसले यांनी यावेळी बोलताना सांगितले.
दरम्यान, विद्यालयातील १२ ते १६ या वयोगटातील मुलींना आरोग्यविषयी मार्गदर्शन करण्यात आले. यामध्ये आहार, प्राणायाम, योग, मेडिटेशन, दंतरोगचा समावेश होता. यासाठी संस्थेच्या उपाध्यक्षा डॉ. स्मिता फरांदे व डॉ. दीपा पलंगे यांचे विद्यार्थ्यांना मार्गदर्शन मिळाले.
