येरवडा : बंगल्याच्या देखरेखीसाठी ठेवण्यात आलेल्या दाम्पत्याने कल्याणी नगरमधील बंद बंगला फोडून तीस लाख रुपयांचे दागिने आणि रोख रक्कम चोरून नेल्याचे पोलीस तपासात निष्पन्न झाले आहे. याप्रकरणी येरवडा पोलिसांनी दोघांना नागपूर येथून अटक केली आहे.
राजपाल वामन हारगे (वय ३९, सध्या रा. कल्याणीनगर, मूळ रा. अवंतीनगर, लातूर) आणि उर्मिला राजपाल हारगे (वय ३८) अशी अटक करण्यात आलेल्या आरोपींची नावे आहेत.
आरोपींकडून घरफोडीतील २७ लाख रुपयांचा मुद्देमाल हस्तगत करण्यात आला असून, त्यांना तीन जानेवारीपर्यंत पोलिस कोठडी सुनावण्यात आली आहे. याप्रकरणी सूरज समरचंद अगरवाल (वय-३१, रा. कुमार सिटी, कल्याणीनगर) यांनी फिर्याद दिली होती.
वरिष्ठ पोलिस निरीक्षक बाळकृष्ण कदम यांनी दिलेल्या माहितीनुसार, कल्याणीनगर येथील कुमार सिटीमध्ये फिर्यादी अगरवाल यांचा बंगला आहे. ते बांधकाम व्यावसायिक असून, हिंजवडीत त्यांचे कार्यालय आहे.
कार्यालयात आरोपी राजपाल ऑफिस बॉय म्हणून कामाला होता. या दरम्यान अगरवाल यांनी आरोपीला आणि त्याच्या पत्नीला सहा महिन्यांपूर्वी कल्याणीनगरमधील बंगल्याच्या शेजारी राहण्यासाठी खोली दिली.
आरोपी राजपाल हारगे याच्यावर खुनाचा गुन्हा दाखल असून, २०१२ ते २०१७ दरम्यान तो औरंगाबाद कारागृहात शिक्षा भोगत होता. पॅरोलवर सुटल्यावर हारगे पुन्हा कारागृहात न जाता पुण्याला पळून आला.
आरोपीला कामाला ठेवताना अगरवाल यांनी पोलिस पडताळणी केली असती, तर घरफोडीचा प्रसंग ओढावला नसता. त्यामुळे घरात, बंगल्यात किंवा कार्यालयात कामासाठी ठेवणाऱ्या प्रत्येकाची पोलिस पडताळणी करून घेण्याचा सल्ला पोलिस अधिकाऱ्यांनी दिला आहे.
सहा महिन्यांपासून आरोपी पती-पत्नी बंगल्याची साफसफाई आणि देखरेख करीत होते. सोमवारी सकाळी अगरवाल कुटुंबीय अलिबागला फिरण्यासाठी गेले होते. बंगला बंद असल्याची संधी साधून राजपाल याने खोलीच्या मागील दाराच्या बाजूने बंगल्याच्या बाथरूमची खिडकी तोडून आत प्रवेश केला. घरातील रोख चार लाख रुपये आणि ५७ तोळे सोने, चांदी आणि हिऱ्याचे दागिने लंपास केले.
दरम्यान, चोरी केल्यानंतर पती, पत्नीने लहान मुलीला सोबत घेऊन पुणे स्थानक गाठले. पुण्यातून टॅक्सीने मुंबईला गेले. तेथून खासगी ट्रॅव्हल्सने नागपूरकडे रवाना झाले. येरवडा पोलिसांना घरफोडीची माहिती मिळताच त्यांनी घटनास्थळी धाव घेतली.
या वेळी हारगे दाम्पत्य फरारी असल्याचे समोर आले. पोलिसांनी ‘सीसीटीव्ही’ आणि तांत्रिक विश्लेषणाच्या मदतीने नागपूर येथून आरोपींना अटक केली. त्यांच्याकडून २७ लाखांचा ऐवज जप्त करण्यात आला आहे.
