पुणे : पुण्यातून एक भीषण अपघाताची बातमी समोर आली आहे. भरधाव मोटार उलटून तरुणीचा मृत्यू झाल्याची घटना घडली आहे. ही घटना १२ जानेवारी रोजी मध्यरात्री साडेबारा वाजण्याच्या सुमारास मुंबई-बंगळुरू बाह्यवळण मार्गावर स्वामी नारायण मंदिराजवळ घडली आहे. या अपघातात सातजण जखमी तर एकाचा मृत्यू झाला आहे. विजया बाजीराव पडवळ (वय-२९, रा. शेळू, ता. आंबेगाव, जि. पुणे) असे मृत्यु झालेल्या तरुणीचे नाव आहे.
या प्रकरणी पाेलीस शिपाई प्रशांत चाटे यांनी सिंहगड रस्ता पोलीस ठाण्यात फिर्याद दिली आहे. त्यावरून मोटारचालक प्रसाद दिलीप ढोले (वय-२५, रा. सावरदरी, ता खेड, जि. पुणे) याच्याविरुद्ध गुन्हा दाखल करण्यात आला आहे. पवन कहाते, विजय आंबेकर, सचिन मंजाबापू, गायत्री मोहिते, सुप्रिया लाड, संदीप मराठे, विजया तसेच मोटारचालक ढोले अशी अपघातात जखमी झालेल्या व्यक्तींची नावे आहेत.
पोलिसांनी दिलेल्या माहितीनुसार, भरधाव मोटार सोमवारी मध्यरात्री साडेबारा वाजण्याच्या सुमारास मुंबई-बंगळुरू बाह्यवळण मार्गावरुन निघाली होती. त्यावेळी नऱ्हे परिसरातील स्वामी नारायण मंदिराजवळ भरधाव मोटारीवरील वाहनचालकाचे नियंत्रण सुटले. त्यामुळे मोटार उलटली.
दरम्यान, वाहनावरील नियंत्रण सुटून माेटार उलटल्याने मोटारचालक प्रसाद याच्यासह मोटारीतल प्रवासी विजया, पवन, विजय, सचिन, गायत्री, सुप्रिया, संदीप हे गंभीर जखमी झाले आहेत. या घटनेची माहिती मिळताच पोलिसांनी घटनास्थळी धाव घेतली आहे. गंभीर जखमी व्यक्तींना तातडीने खासगी रुग्णलयात दाखल करण्यात आले आहे. मात्र, विजया हीचा उपचारादरम्यान मृत्यू झाला आहे. पुढील तपास पोलीस उपनिरीक्षक अक्षय पाटील करत आहेत.
