हनुमंत चिकणे
उरुळी कांचन : दरवर्षीप्रमाणे यंदाही उरुळी कांचन (ता. हवेली) येथील कस्तुरी प्रतिष्ठानच्या वतीने गरजुंसाठी सर्वधर्मीय सामुदायिक विवाह सोहळा दत्त जयंतीच्या शुभ मुहूर्तावर बुधवारी (ता. ०७) मोठ्या उत्साहात पार पडला. या विवाह सोहळ्यात ६ जोडप्यांचे विवाह पार पडले असून वधुवरांना लग्नाचा पोशाख, जीवनावश्यक संसारोपयोगी भांडी, बूट, चप्पल व सर्वांच्या भोजनाची व्यवस्था प्रतिष्ठानच्या वतीने करण्यात आली होती.
उरुळी कांचन (ता. हवेली) येथील कस्तुरी मंगल कार्यालय या ठिकाणी या सोहळ्याचे आयोजन करण्यात आले होते. या सामुदायिक विवाह सोहळा विविध स्तरातील मान्यवरांच्या साक्षीने व हजारो नागरिकांच्या उपस्थितीत उत्साहात पार पडला. वधू-वरांची मिरवणूक वाजत – गाजत काढण्यात आली. कोणता धर्म, जात नाही तर केवळ आयुष्यभर एकमेकांना साथ देण्यासाठी सात फेरे घेत दत्त जयंतीच्या शुभ मुहूर्तावर बुधवारी ६ जोडप्यांनी रेशीमगाठी बांधल्या.
लग्न सोहळ्यात उपस्थित असलेल्या वधू वरांच्या नातेवाइकांना व उपस्थित असलेल्या नागरिकांना स्वादिष्ट भोजन देण्यात आले. या विवाह सोहळ्यातील वधुवरांना लग्नाचा पोशाख, जीवनावश्यक संसारोपयोगी भांडी, बूट, चप्पल व सर्वांच्या भोजनाची व्यवस्था प्रतिष्ठानच्या वतीने करण्यात आली होती.
यंदाचे हे सामुदायिक विवाह सोहळ्याचे १२ वे वर्ष आहे. शेतकऱ्यांनी मुलामुलींच्या लग्नासाठी कर्ज काढू नये आणि बँका, पतसंस्था किंवा सावकारांच्या कठोर वसुलीस त्यांना तोंड द्यावे लागू नये, म्हणून नैतिक जबाबदारी स्विकारत विवाह सोहळ्यास सुरुवात कस्तुरी प्रतिष्ठानतर्फे केली होती. विवाहात सहभागी नवदांपत्यास मणी मंगळसूत्र, नवरदेवाचा सफारी, संसारोपयोगी भांडी, बूट व चप्पल देण्यात आली.
दरम्यान, यावेळी लोणी काळभोर पोलीस ठाण्यातील वाहतूक शाखेच्या पोलीस कर्मचारी आरती खलचे यांना उरुळी कांचन येथील रहदारी नियंत्रण व्यवस्था उत्तम प्रकारे बजावत असल्याबद्दल प्रतिष्ठानच्या वतीने त्यांचा गौरव पुरस्कार देऊन सन्मानित करण्यात आले. यावेळी कस्तुरी प्रतिष्ठानचे उपाध्यक्ष संतोष भन्साळी, सचिव शंकर पाटील, खजिनदार महादेव रेवडकर, सदस्य घनश्याम मेमाने, ऋषिकेश जगताप, महेश कुंकूलोक, कौस्तुभ मेमाणे, गणेश उंबरकर, दत्तात्रय मदने, खेमचंद पुरुषवाणी बापूसाहेब लाड व हजारो वऱ्हाडी उपस्थित होते.
याबाबत बोलताना कस्तुरी प्रतिष्ठानचे अध्यक्ष मिलिंद मेमाने म्हणाले, “गरिबांची लग्न झाली पाहिजे सर्वसामान्य नागरिक हा कर्जबाजारी झाला नाही पाहिजे. जास्त लग्न झाल्याने खर्चहि कमी येतो. गरिबांनी या अशा विवाह सोहळ्यात सहभागी होऊन लग्न केली पाहिजेत. कस्तुरी प्रतिष्ठानचे पहिल्यापासूनच ब्रीदवाक्य आहे. प्रार्थना करणाऱ्या ओढांपेक्षा मदत करणारे हात पवित्र असतात जेवढे आपल्या हाताने करता येते तेवढे आपण केले आहे.”
