मुंबई : राज्यात भाजपकडून पुन्हा एकदा ऑपरेशन लोटस राबवण्यात येणार असल्याची माहिती समोर आली आहे. या मोहीमेतंर्गत शरद पवार गटाचे काही खासदार फोडले जाण्याची शक्यता आहे, अशी माहिती विश्वसनीय सूत्रांनी दिली आहे. यंदाच्या लोकसभा निवडणुकीत शरद पवार गटाचे एकूण आठ खासदार निवडून आले आहेत. यापैकी ५ ते ६ खासदार आपल्याकडे घेऊन मविआला मोठा झटका देण्याचा भाजपचा प्लॅन असल्याची माहिती समोर आली आहे.
भाजपकडे आलेल्या शरद पवार गटातील या खासदारांना राजीनामा द्यायला लावून महाराष्ट्रातील पाच ते सहा मतदारसंघात पोटनिवडणूक घेतली जाऊ शकते. या आमदारांना अजित पवारांच्या राष्ट्रवादीच्या तिकीटावर निवडून आणून भाजपप्रणित एनडीए आघाडीची ताकद वाढण्याचा भाजपचा प्लॅन आहे.
त्यामुळे राज्यात भाजपचे ऑपरेशन लोटस नेमके कधी सुरु झाले, याविषयी जोरदार चर्चा रंगली आहे. विधानसभा निवडणुकीच्या निकालानंतर सागर बंगल्यावर झालेली देवेंद्र फडणवीस आणि शरद पवार गटाचे खासदार सुरेश म्हात्रे उर्फ बाळ्यामा यांची भेट हा ऑपरेशन लोटसचा आरंभबिंदू होता का, याविषयी आता राजकीय वर्तुळात तर्कवितर्कांना उधान आले आहे.
विधासभेच्या निकालानंतर भाजपला प्रचंड बहुमत मिळाले आहे. त्यानंतर देवेंद्र फडणवीस यांच्या सागर बंगल्यावर अनेक नेत्यांची रीघ लागली होती. मात्र 2 डिसेंबरला शरद पवार गटाचे भिवंडी मतदारसंघातील खासदार बाळ्यामामा अचानक सागर बंगल्यावर देवेंद्र फडणवीसांच्या भेटीला गेल्याने राजकीय वर्तुळाच्या भुवया उंचावल्या होत्या.
देवेंद्र फडणवीस यांच्या भेटीनंतर बाळ्यामामा यांनी ही राजकीय भेट नसल्याचे स्पष्टीकरण दिले होते. आम्ही एकमेकांना भेटलो म्हणजे प्रत्येकवेळी त्यामागे राजकारण असतंच असं नाही, असे बाळ्यामामा यांनी स्पष्ट केले होते. मात्र, आता राज्यात ऑपरेशन लोटस सुरु झाल्याची चर्चा नव्याने सुरु झाली आहे. त्यामुळे देवेंद्र फडणवीस आणि बाळ्यामामा यांची भेटही जोरदार चर्चेत आली आहे.
