पुणे : दारु पार्टी केल्यानंतर घरी जात असताना नाकाबंदीमधील महिला पोलिसांनी थांबविल्यावर दारु पिल्याचे समजू नये, म्हणून बॅरिकेटला धडक देऊन महिला पोलिसास फरफटत नेल्याची घटना घडली होती. या प्रकरणी कारचालकाला पोलिसांनी अखेर बेड्या ठोकल्या आहेत. अर्णव पवनकुमार सिंघल (वय- २४, रा. जनवाडी, मुळ रा. जिंजर अपार्टमेंट, फिरोजाबाद, उत्तर प्रदेश) असे कार चालकाचे नाव आहे.
याबाबत अधिक माहिती अशी कि, एस.एस.पी.एम.एस. कॉलेज समोर रविवारी रात्री पासून नाकाबंदी करण्यात आली होती. त्यावेळी पहाटे दीड वाजण्याच्या सुमारास एका कारला पोलिस अंमलदार दिपमाला राजू नायर यांनी थांबण्याचा इशारा केला. तेव्हा कारचालकाने बॅरिकेटला धडक देत नायर यांना फरपटत नेले होते. या घटनेची पोलिसांनी दखल घेतली. अपर पोलिस आयुक्त शैलेश बलकवडे, पोलिस उपायुक्त निखिल पिंगळे यांनी युनिट १, युनिट २ आणि युनिट ४ यांना तसेच पोलिस उपायुक्त स्मार्तना पाटील यांनी समांतर तपास करण्याचे आदेश देण्यात आले.
दरम्यान, महिला पोलिस अंमलदार नायर यांना जखमी करणारी कार कोरेगाव पार्क येथील हॉटेलमध्ये असल्याचे पोलीस तपासात निदर्शनास आले. तेव्हा युनिट २ च्या पथकाने अपघातातील कारचालकाची माहिती काढली. कारचालक हा जनवाडी भागातील रहिवाशी आहे. ही कार खडकी टाईप रेंज हिल्स भागात आहे अशी माहिती मिळाली. या अपघातातील कार बंडगार्डन पोलीस ठाण्याच्या पथकाने ताब्यात घेतली आहे.
वरिष्ठ पोलिस निरीक्षक अजय वाघमारे हे पथकासह जनवाडी भागात पेट्रोलिंग करुन अपघात करणार्‍या कार चालकाचा शोध घेत होते. त्यावेळी पोलिस उपनिरीक्षक वैभव मगदुम यांना बातमीदारांकडून प्राथमिक माहिती मिळाली की, कारचालक आरोपी जनवाडी येथून गावी जाणार आहे. तात्काळ बातमीच्या ठिकाणी जाऊन पोलिसांनी अर्णव सिंघल याला ताब्यात घेतले आहे.
