दिल्ली : दिल्लीच्या अशोक विहारमध्ये एक धक्कादायक घटना समोर आली आहे. प्रेमात मुलगी अडथळा ठरत असल्याने एका जन्मदात्या आईने आपल्या पाच वर्षांच्या मुलीची गळा आवळून हत्या केल्याची घटना घडली आहे. ही घटना चंद बंधू रुग्णालयातून समोर आली असून पोलिसांनी महिलेला अटक केली आहे.
पोलिसांनी दिलेल्या माहितीनुसार, महिलेची मैत्री इंस्टाग्रामवरुन राहुल नावाच्या एका व्यक्तीशी झाली होती. त्यानंतर दोघं एकमेकांच्या प्रेमात पडले. महिला त्याच्याशी लग्न करु इच्छित होती. मात्र जेव्हा राहुल आणि त्याच्या कुटुंबियांनी महिलेच्या मुलीला स्विकारण्यास नकार देत लग्न मोडले. त्यामुळे निराश झालेल्या महिलेने मुलीचा गळा आवळून हत्या केली.
मुलीचा मृतदेहाची तपासणी केली असता तिच्या गळ्याजवळ व्रण दिसले. त्यानंतर पोलिसांनी महिला आणि तिच्या कुटुंबियांची चौकशी केली. कसून चौकशी केली असता महिलेने गुन्ह्याची कबुली दिली. ती म्हणाली, तिच्या पहिल्या पतीने तिला सोडून दिले होते. त्यानंतर ती इंस्टाग्रामच्या माध्यमातून राहुलच्या प्रेमात पडली. आणि आम्ही दोघे लग्न देखील करणार होते. मात्र, तिला पाच वर्षाची मुलगी असल्याने त्याने लग्नास नकार दिला.
महिला दिल्लीला राहुलकडे येण्यापूर्वी हिमाचल प्रदेशमध्ये एका नातेवाईकाकडे गेली होती. त्याच दरम्यान नातेवाईकाने तिच्या मुलीचे लैगींक शोषण केले होते. ही घटना पोलीस तपासात समोर आली. पोलिसांनी आरोपी महिलेला अटक केली असून पोलीस पुढील तपास करत आहेत.
