पुणे : पुण्यात अपघाताचे सत्र सुरुच आहेत. यामध्ये अनेक नागरिकांना आपला जीव गमवावा लागत आहे. अशातच आता टेम्पो व दुचाकीमध्ये झालेल्या धडकेत दुचाकीवरील तरुण-तरुणी जागीच ठार झाल्याची घटना घडली आहे. ही घटना गुरुवारी (दि.21) सकाळी बेल्हे-जेजुरी महामार्गावर मंगरुळ येथील कुकडी नदीच्या वळणावर घडली आहे.
रत्नाकार श्रीमंत गायकवाड (वय-36, रा. कोंढवा, पुणे) आणि आरती राजु माने (वय-38, रा. जुनी सांगवी, पुणे) अशी मृत्यू झालेल्यांची नावे आहेत. यासंदर्भात शुभम शिवदास दुधाळ यांनी फिर्याद दिली आहे.
याघटनेसंदर्भात पोलीसांनी दिलेल्या माहितीनुसार, रत्नाकार आणि आरती हे दोघे पुण्यावरुन शिर्डीला देवदर्शनासाठी दुचाकीवरुन निघाले होते. मंगरुळ येथील कुकडी नदीच्या वळणावर समोरुन येणा-या टेम्पोने दुचाकीला धडक दिली. यामध्ये रत्नाकर व आरती हे दोघे चिरडले गेले. अशातच दोघांचा जागीच मृत्यू झाला. या अपघाताची माहिती मिळताच घटनास्थळी आळेफाटा पोलीस दाखल झाले.
या प्रकरणी पोलीसांनी टेम्पो चालक भारत शिरतार (रा. सिन्नर, जि. नाशिक) याला ताब्यात घेतले असून त्याच्यावर गुन्हा दाखल करण्यात आला आहे. या प्रकरणाचा पुढील तपास पोलीस करत आहे.
