मुंबई : मुंबई उपनगरातील , चेंबूर येथील सिद्धार्थ कॉलनीत दुमजली घराला भीषण आग लागल्याची घटना घडली आहे. या आगीत एकाच कुटुंबातील पाच जणांचा होरपळून मृत्यू झाल्याची माहिती समोर येत आहे. ही दुर्घटना रविवारी पहाटे सिद्धार्थ नगर परिसरात घडली आहे.
पारिस गुप्ता (वय 7), मंजू प्रेम गुप्ता (वय 30), अनिता प्रेम गुप्ता (वय 39), प्रेम गुप्ता (वय 30), नरेंद्र गुप्ता (वय 10) अशी मृत व्यक्तींची नावे आहेत. तर दोन जण जखमी आहेत. त्यांच्यावर सध्या रुग्णालयात उपचार सुरू आहेत.
मिळालेल्या माहितीनुसार, चेंबूर येथीलसिद्धार्थ कॉलनी मध्ये ही आग लागली आहे. यावेळी पहाटेच्या वेळी सर्वजण झोपेत असताना शॉर्ट सर्किटमुळे आग लागल्याची प्राथमिक माहिती समोर येत आहे. यावेळी एकाच कुटुंबातील पाच जणांचा मृत्यू झाला आहे. या मृतांमध्ये एक 7 वर्षीय मुलगी आणि 10 वर्षीय मुलाचाही समावेश आहे.
घटनास्थळी पोलीस आणि अग्निशमन दल दाखल झाले असून आग आटोक्यात आणण्यात आली आहे. आगीतील जखमींना तात्काळ राजावाडी रुग्णालयात दाखल करण्यात आले होते. मात्र त्यांना मृत घोषीत करण्यात आले. एकाच कुटुंबातील पाच जणांचा मृत्यू झाल्याने परिसरात हळहळ व्यक्त केली जात आहे.
