पुणे: दौंड तालुक्यातील देऊळगावराजे येथे शेतात काम करत असलेल्या महिलांजवळ येऊन तुमची मतदानाची माहिती द्या अशी बतावणी करत व इतर काही विषय बोलण्याच्या नादात गुंतवून महिलेच्या गळ्यातील 50 हजाराचे सोन्याचे दागिने हिसकावून अज्ञात चोरट्याने धूम ठोकली. ही घटना देऊळगाव राजे येथील शेतकरी प्रमोद सुभाष काळे यांच्या शेतात शनिवारी (दि. 21) रोजी घडली आहे.
राणी मल्हारी बडगे व मुक्ताबाई लहु जाधव या दोन शेतमजूर महिला शेतातील कामे करीत होते. दुपारी 2 वाजण्याच्या सुमारास या महिला जेवण करण्यासाठी बसल्या होत्या. त्यावेळी तिथे अंगात निळसर रंगाचा शर्ट व पांढऱ्या रंगाची पँण्ट घातलेला वय अंदाजे 40 ते 45 वर्षाचा एक अज्ञात व्यक्ती तिथे आला आणि त्या दोन्ही महिलांना तुमच्याकडून मतदानाची माहिती हवी आहे असे म्हणून माहिती विचारू लागला. माहिती विचारून झाल्यानतंर थोडा वेळ थांबून अचानक दोघींच्याही गळ्यातील सोन्याचे मणी, मंगळसुत्र खेचून तेथून पळून गेला. व शेतापासून काही अंतरावर लावलेल्या मोटरसायकलवर बसून या चोरट्याने दिवसाढवळ्या धूम ठोकली.
या चोरीमध्ये अंदाजे 50 हजार रुपये किंमतीचे गळ्यातील सोन्याचे दागिने चोराने पसार केले. याबाबत राणी बडगे हिने दौंड पोलीस ठाण्यात फिर्याद दिल्यानंतर अज्ञात चोरट्याविरूध्द चोरीचा गुन्हा दाखल करण्यात आला. दौंड पोलीस पुढील तपास करीत आहेत.
