डोंबिवली : डोंबिवलीमधून एक धकाकड्याक बातमी समोर आली आहे. ‘जागा माझी खासगी आहे, माझ्या खासगी जागेवर तुम्ही उभे का आहात?’ या कारणावरून जागा मालकाने तरुणाशी वाद घातला. इतकेच नाही तर संतापलेल्या कार चालकाने आपली कार थेट या तरुणाच्या अंगावर घालत त्याला काही अंतरापर्यत फरफटत नेल्याचा धक्कादायक प्रकार डोंबिवली पूर्वेकडील दावडी परिसरात घडला आहे. डोंबिवली दावडी परिसरातील तुकाराम नगर येथे संजय यादव हा तरुण राहतो.
मिळालेल्या माहितीनुसार, शनिवारी रात्री साडे नऊ वाजताच्या सुमारास संजय दावडी येथील शिव मंदीर परिसरात रस्त्याच्या बाजूला एका जागेवर उभे राहून त्याच्या मित्राशी बाेलत होता. याच वेळी त्याठिकाणी मिलिंद ठाकरे हा व्यक्ती त्याच्या जवळ आला. ज्या जागेवर तुम्ही उभे आहात. ती जागा माझी खासगी मालकीची आहे. त्या जागेवर उभे राहून का बोलत आहात. या कारणावरुन मिलिंद आणि संजय यांच्यात वाद झाला. त्यानंतर संजय हा घराकडे जाण्यासाठी निघाला.
दरम्यान, संजय हा रस्त्याने जात असताना मिलिंद ठाकरे याने कार घेऊन आले. त्यांनी संजयला मागून धडक देत त्याला काही अंतरापर्यंत फरफटत नेले. हा संपूर्ण प्रकार सीसीटीव्ही कॅमेरात कैद झाला आहे. घटनेत संजय यादव याच्या पायाला गंभीर दुखापत झाली असून त्याच्यावर रुग्णालयात उपचार सुरु आहेत. मानपाडा पोलिसांनी या प्रकरणात मिलिंद ठाकरे याच्या विरोधात हत्येच्या प्रयत्नाचा गुन्हा दाखल केला आहे. पोलिस आरोपीचा शोध घेत आहेत.
