पुणे : वडिलांचे मुलासोबत भांडण झाले. त्यानंतर पत्नीने भांडणात मध्यस्थी केल्याने दारूच्या नशेत पतीने पत्नीचे बोट कापल्याची धक्कादायक घटना समोर आली आहे. याप्रकरणी पत्नीने आळंदी पोलीस ठाण्यात तक्रार दाखल केली. त्यानंतर पोलिसांनी पतीविरोधात गुन्हा दाखल करून आरोपीला अटक केली आहे. सूरज पासवान असं अटक करण्यात आलेल्या आरोपीचे नाव आहे. दरम्यान, कुटुंबीयांनी महिलेला तातडीने रुग्णालयात दाखल करून तिच्यावर उपचार करण्यात आले.
पोलिसांनी दिलेल्या माहितीनुसार, सूरज पासवान याला दारू पिण्याचे व्यसन आहे. त्यांची पत्नी संजू पासवान एका खासगी कंपनीत मजूर म्हणून काम करते. शनिवारी सूरज पासवान यांचे मुलासोबत काही कारणावरून भांडण झाले होते. हे पाहून सूरजची पत्नी संजू पासवान यांनी मध्यस्थी करण्यासाठी पुढे गेल्या. यामुळे सूरजला राग अनावर झाला.
याच रागातून सूरज पासवानने पत्नी संजू पासवानच्या उजव्या हाताचे एक बोट कापले. या घटनेत पत्नी गंभीर जखमी झाली. तिला तातडीने रुग्णालयात दाखल करण्यात आले. दरम्यान, आता तिची प्रकृती ठीक आहे. मात्र या घटनेनं परिसरात मोठी खळबळ उडाली होती. या घटनेनंतर पीडित महिलेने आळंदी पोलीस ठाण्यात फिर्याद दिली आहे. त्यावरून पोलिसांनी सूरज पासवानला अटक केली असून त्याची न्यायालयीन कोठडीत रवानगी करण्यात आली आल्याची माहिती आळंदी पोलीस ठाण्याचे वरिष्ठ निरीक्षक भीमा नरके यांनी दिली.
