बारामती : माळेगाव पोलीस ठाण्याच्या हद्दीत एक धक्कादायक घटना घडली आहे. एका तरुणीशी मैत्री केल्याच्या कारणावरून तिघाजणांनी एका तरुणाला बेदम मारहाण केली आहे. या मारहाणीत तरुणाचे डोके फुटले असून प्रकृती चिंताजनक आहे. अक्षय बाळासाहेब जाधव (वय 29 रा. माळेगाव, ता. बारामती) असे या जखमी युवकाचे नाव आहे.
याप्रकरणी जखमी अक्षयचे वडील बाळासाहेब लक्ष्मण जाधव यांनी माळेगाव पोलीस ठाण्यात फिर्याद दिली आहे. त्यावरून पोलिसांनी यश राजेंद्र कांबळे, अमित अविनाश कांबळे (दोघे रा. खांडज) व उत्कर्ष दत्तात्रय भोसले (रा. माळेगाव) आणि आणखी तीन अनोळखी व्यक्तीविरोधात गुन्हा दाखल केला आहे.
पोलिसांनी दिलेल्या माहितीनुसार, तिघाजणांनी अक्षयला दुचाकीवर बसवून माळेगावच्या अभियांत्रिकी महाविद्यालयाच्या पाठीमागील नीरा डाव्या कालव्याच्या जवळ असलेल्या मोकळ्या जागेत नेले. त्या ठिकाणी आधीच तिघेजण थाबले होते. या ठिकाणी अक्षयला बेदम मारहाण केली. या मारहाणीत अक्षय गंभीर जखमी झाला असून, त्याची कवटी फुटली आहे. त्याला उपचारासाठी रुग्णालयात दाखल करण्यात आले आहे. दरम्यान, माळेगाव पोलिसांनी गुन्हा दाखल केला असून पुढील तपास माळेगाव पोलीस करत आहेत.
