लोणी काळभोर, (पुणे) : अष्टविनायक महामार्गावर कार व हायवाचा समोरासमोर भीषण अपघात झाल्याची घटना घडली आहे. ही घटना थेऊर (ता. हवेली) ग्रामपंचायत हद्दीतील कुंजीर पाटील वस्ती जवळ रविवारी (ता. १) दुपारी पावणेचार वाजण्याच्या सुमारास घडली आहे. या अपघातात विक्रीकर अधिकाऱ्याचा जागीच मृत्यू झाला आहे. अभिजीत पवार (वय-38 रा. लोहगाव, पुणे) असे मृत्यू झालेल्या विक्रीकर अधिकाऱ्याचे नाव आहे. या घटनेने परिसरात हळहळ व्यक्त केली जात आहे.
मिळालेल्या माहितीनुसार, अभिजीत पवार हे त्यांच्या कुटुंबासोबत अष्टविनायक महामार्गावरून कारने चालले होते. थेऊरकडून थेऊर फाट्याच्या दिशेने जात असताना कुंजीर पाटील वस्तीजवळ आले असता त्यांच्या कारला समोरून येणाऱ्या हायवाने जोरदार धडक दिली. या अपघातात अभिजीत पवार हे गंभीर जखमी झाले होते. तर गाडीतील इतर कोणत्याही व्यक्तीला इजा झाली नव्हती.
दरम्यान, अभिजीत पवार हे अपघातात गंभीर जखमी झाल्याने उपचारासाठी लोणी काळभोर येथील विश्वराज हॉस्पिटलमध्ये दाखल करण्यात आले होते. मात्र तेथील डॉक्टरांनी त्यांचा उपचारापूर्वीच मृत्यू झाल्याचे घोषित केले.
