सागर घरत
करमाळा : इंदापूर तालुक्यातील शिरसोडी ते करमाळा तालुक्यातील कुगांव यांना जोडणाऱ्या उजनी धरणाच्या जलाशयावर पुलाचे बांधकाम करण्यासाठी ३८२ कोटी २२ लक्ष निधी मंजूर आहे. या कामाचे भूमिपूजन राज्याचे उपमुख्यमंत्री अजित पवार यांचे हस्ते व इंदापूर तालुक्याचे आमदार दत्ता भरणे, करमाळा तालुक्याचे आमदार संजयमामा शिंदे यांच्या उपस्थितीत शिरसोडी येथे करण्यात आले.
उजनी धरणाच्या निर्मितीनंतर तब्बल ४० वर्षांनी ३८२ कोटी निधी मंजूर करून महायुती सरकारने ऐतिहासिक काम केले आहे. या पुलामुळे फक्त २ गावे जवळ येणार नसून तर २ तालुके, २ जिल्हे जवळ येणार आहेत, याचा फायदा दळणवळणासाठी होणार असून राज्याचे २ विभाग जवळच्या मार्गाने जोडले जाणार आहेत. बॅकवॉटर भागातील केळी, ऊस या शेतीमालाची वाहतूक तसेच पर्यटन विकास यासाठी या पुलाचा फायदा होणार आहे.
कुगाव ते कळाशी दरम्यान जलवाहतूक करणारी बोट बुडून ५ व्यक्तींचा मृत्यू झाल्याची घटना घडली होती. अशा दुर्घटना पुन्हा होऊ नये यासाठी आमदार संजय शिंदे यांनी अधिवेशनात पुल बांधकामाची मागणी केली होती.आज प्रत्यक्ष या कामाचे भूमिपूजन होत असल्याने करमाळा तालुक्यासाठी तसेच इंदापूर तालुक्यासाठी हा ऐतिहासिक क्षण असल्याची भावना अनेक नागरिकांनी व्यक्त केल्या आहेत.
