लोणीकंद (पुणे) : ज्येष्ठ महिलेच्या घरी जाऊन मंगळसुत्र बाजूला काढा, चांगला मसाज करतो, असे सांगून चोरट्यांनी मंगळसुत्रच चोरून नेल्याची घटना आव्हाळवाडीत घडली आहे.
ही घटना समोवार (ता. १४) सकाळी साडेआठ वाजण्याच्या दरम्यान घडली आहे. याप्रकणी एका तरुणाने लोणीकंद पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी यांची आई घरी होती.चोरटे त्यांच्या घरी आले आणि त्यांचा विश्वास संपादन केला. मी चांगला मसाज करतो, तुम्हाला खूप आराम मिळेल असे सांगितले.
फिर्यादीच्या आईने मसाज करण्यासाठी होकार दिला त्यानंतर चोरट्याने गळ्यातील मंगळसुत्र बाजूला काढा असे सांगितले. फिर्यादीच्या आईने गळ्यातील अडीच तोळ्याचे ७० हजार रुपयांचे मंगळसुत्र मसाज करताना बाजूला ठेवले. त्यानंतर चोरट्याने नजर चुकवून मंगळसुत्र चोरुन नेले.
दरम्यान, फिर्यादी तरुणाला या घटनेची माहिती मिळताच त्याने लोणीकंद पोलीस ठाण्यात फिर्याद दिली. या घटनेचा पुढील तपास पोलीस उपनिरीक्षक कोळपे करत आहेत.
