मुंबई : मुंबई येथील सांताक्रुज परिसरात शालेय विद्यार्थ्यांना घरी घेऊन जाणाऱ्या स्कूल बसचा भीषण अपघात झाल्याची बातमी समोर आली आहे. सांताक्रुज पश्चिमेकडील मॅनोर इंटरनॅशनल स्कूलची ही बस असल्याची प्राथमिक माहिती मिळत आहे. ही बस भरधाव वेगात असल्यामुळे चालकाचे नियंत्रण सुटून हा अपघात झाला आहे.
या अपघातात बस चालकासह एकूण सहा जण जखमी झाले आहेत. यामध्ये चार विद्यार्थी आणि बसमधील केअर टेकर महिलेचा देखील समावेश आहे. यामध्ये बसचे मोठ्या प्रमाणावर नुकसान झाले असून चालकाच्या डोक्याची कवटी देखील फुटली असल्याचे बोलले जात आहे.
जखमी व्यक्तीवर सांताक्रुज येथील नानावटी रुग्णालयात उपचारासाठी दाखल करण्यात आले आहे. याप्रकरणी पालकांनी वाकोला पोलीस ठाण्यात चालकाविरोधात तक्रार दाखल केली असून पोलिसांनी गुन्हा दाखल केला आहे. याबाबत वाकोला पोलीस अधिकचा तपास करत आहेत.
