पुणे : गेले काही दिवस राज्यात पावसाचा जोर दिसून येत होता परंतु सध्या राज्यातील बहुतांश भागात पावसाचा जोर कमी झाला आहे. राज्यातील अनेक भागात भागात चांगला पाऊस झाला आहे. नदी नाले दुथडी भरुन वाहू लागले होते तर धरणांच्या पाणीसाठ्यात देखील वाढ झाली आहे. आज राज्याच्या काही जिल्ह्यात मुसळधार पावसाचा इशारा हवामान विभागाकडून देण्यात आला आहे.
‘या’ भागात पावसाचा यलो अलर्ट जारी
हवामान विभागानं दिलेल्या माहितीनुसार, आज राज्यातील पाच जिल्ह्यात पावसाचा यलो अलर्ट जारी करण्यात आला असून यामध्ये कोकणातील रायगड, पश्चिम महाराष्ट्रातील पुणे तर विदर्भातील यवतमाळ, वर्धा आणि अमरावती या जिल्ह्यांचा समावेश आहे. या पाच जिल्ह्यांना पावसाचा यलो अलर्ट जारी करण्यात आला असून जिल्ह्यातील नागरिकांनी योग्य ती खबरदारी बाळगावी असं आवाहन प्रशासनाकडून करण्यात आले आहे.
पुण्यात पाऊस ओसरला..
पुणे शहर परिसरात सद्या पावसाने विश्रांती घेतली असून गेल्या दोन दिवसांपासून पावसाचा जोर ओसरल्याचं चित्र आहे. पुण्यात पावसाने हैदोस घातला होता. मुसळधार पावसामुळे पाण्याचा प्रश्न मिटला आहे. पिंपरी-चिंचवड शहर आणि परिसराला पाणीपुरवठा करणाऱ्या पवना धरणात 7.97 टीएमसी (93.64 टक्के) पाणीसाठा जमा झाला आहे. पुणे जिल्ह्यातील इतर धरणांपैकी कळमोडी, आंद्रा, भाटघर आणि उजनी ही धरणे 100 टक्के भरली आहेत. या धरणांमधून नदीपात्रात पाण्याचा विसर्ग करण्यात येत आहे.
मुंबईला पाणीपुरवठा करणारी धरणं भरली..
मुंबईला पाणीपुरवठा करणारी चारही धरणं ओव्हर फ्लो झाल्याने मुंबईकरांची वर्षभराची पाण्याची चिंता मिटली असल्याचे चित्र आहे. मुसळधार पाऊस पडल्याने चारही धरणं ओव्हर फ्लो झाली आहेत. यामध्ये तानसा, त्या पाठोपाठ मोडकसागर धरण, भातसा धरणही ओव्हर फ्लो होऊन वाहत आहे. तसेच वैतरणा धरण देखील वाहू लागल्याने मुंबईकरांची पाण्याचा प्रश्न मिटला आहे.
